Miguel Iglesias - Trail & Run GZ

Tras as boas sensacións da anterior carreira na Popular da Pobra do Caramiñal, tocou cambiar de terreo e volver ao monte para iso despraceime ata Padrón onde ía celebrar o VI Trail Desafío Vértice, sobre unha distancia de 22Km e 1500m+ que sería a distancia longa, este ano ía con todo pero co que non contaba era coa chuvia do día anterior...

O obxectivo sería:

O percorrido duro e técnico, sufriu cambios de última hora polas chuvias do día anterior. Saída dende Agrela xa subindo cara o Alto da Grela, baixada e subida ao Alto das Cruces. Pasamos novamente polo Alto da Grela para comezar a poñer rumbo a Padrón. Zonas con continúo sube e baixa case sen descanso e algunha parte máis técnica que outra ata chegar aos pés do Monte Meda. Subida ata o Alto dos Eólicos, baixada que esperaba máis dura, volta a subir ata o Alto do Monte Meda, dende aí baixada técnica e a última parte xa para correr o que che permitan as pernas.

En canto a organización practicamente perfecta: moi boa información pre-carreira con un correo enviado o día anterior con unha guía da carreira indicando o programa, localizacións, percorrido, avituallamentos, material obrigatorio, zonas perigosas ata parte meteorolóxico e algunha cousa máis... Dúas distancias a escoller 13Km ou 22Km e este ano tamén andaina; boa zona para aparcar; posibilidade de recoller o dorsal o día anterior ou o mesmo día; servizo de gardarroupas na saída; servizo de autobuses ata o lugar da saída; voluntarios ao longo do percorrido; moi boa marcaxe do percorrido; tres avituallamento intermedios, completo, completo e liquido, para min mellor colocados que o ano pasado; avituallamento final completo; duchas preto da meta e auga quente que non é moi habitual nese polideportivo; festa final con pizza, cervexa e xeado; agasallo dun cinto de trail.
A mellorar pois fíxose moita cola a hora de recoller os dorsais no propio día supoño que fomos todos no mesmo momento, aínda que xa estabamos avisados dos cruces abertos ao tráfico igual poñer unha sinal como os que había nas baixadas técnicas informando non sobraba.

🏆 Clasificación xeral homes 🏆

 

Tras participar dous días atrás na Carreira Nocturna de San Xoán, tocou participar por primeira vez no Trail Heroica Sacra, proba que ten saída en Chantada e chegada a meta na Praia Fluvial Da Cova no Concello de O Saviñao. Con varias distancias a escoller ou modalidades, no meu caso estaría participando na distancia de 23Km e 1150 m+ correndo entre os viñedos da Ribeira Sacra e supoño que cunhas vistas espectaculares.

O obxectivo sería:

O percorrido con saída en Chantada e unha primeira parte máis fácil ata que nos imos chegando ao viñedos e se ía volvendo o terreo máis duro e técnico. Ao chegar a Belesar pola metade da proba aproximadamente quedaba o máis duro xa que había moita subida e as pernas xa ían sufrindo. A meta nun lugar espectacular como é a Praia da Cova no concello de O Saviñao.

En canto a organización estivo todo moi ben, recollida de dorsais o día previo ou o mesmo día, opcións de varias distancias, relevos ou andaina, servizo de gardarroupas na saída, voluntarios nos cruces, avituallamento intermedio o primeiro líquido e os demais completos, a maiores habilitaron varios puntos para repoñer auga, avituallamento final completo, moi boa marcaxe do percorrido, comida final na meta con ensalada de pasta, embutidos, bebida... opción de levar acompañantes a comida mediante pago previo, servizo de duchas ou rio, servizo de autobuses para levar aos participantes ao punto intermedio ou de regreso a Chantada e agasallo dunha bolsa e dunha camiseta.

Pouco se pode mellorar porque o trail é unha pasada pero si que un pouco máis de info no regulamento co tema das duchas non viña mal porque eu tiven que preguntar alí a un compañeiro para saber como ía o tema e que finalmente había unha especie de duchas portátiles na meta ou te podías meter no rio.

🏆 Clasificación Xeral Homes 🏆

Tras correr hai dous días a Carreira Abanca Semana Verde, fun participar por primeira vez neste trail aínda que xa coñecía algunha parte de cando fixen o Trail Castro Barbudo. Tocou desprazarse ata Rianxo, concretamente ata Taragoña onde se ía celebrar o V Trail Subida Pico Muralla sobre unha distancia de 22Km e case 1000 m+.

O obxectivo sería:

O resultado final foi:

O percorrido pareceume duro e rápido. O primeiro Km e medio para correr mentres se vai estirando o grupo de corredores e a partir de aí xa comezamos a subir seguido ata o Km 6 aprox. Baixamos un pouco para "recuperar" e comezar a subida ao Pico Muralla ata o Km 11. Dende aí xa practicamente todo o tempo baixando ata unha última subida de 1Km aprox. ata o Castro Barbudo xa no Km 19. Os últimos 3Km restantes con terreo favorable ata meta.

En canto a organización o positivo foi a boa zona para aparcar nas inmediacións do polideportivo que era onde estaba a saída, ademais do trail tamén había unha andaina, servizo de gardarroupas, voluntarios nalgún cruce non en todos, o 1º avituallamento intermedio completo, avituallamento final tamén completo aínda que igual algo escaso para o que se espera nun trail, marcaxe do percorrido correcto aínda que si que houbo algún corredor que se perdeu e duchas ao carón da meta.

A parte negativa foi o segundo avituallamento xa que non se sabía se era ese o avituallamento, explícome, cando cheguei a meta pensando de que non o había, entereime de que eran unha botellas de auga que estaban ao carón dun coche de protección civil creo, en carreira eu vinas pero pensei que era un punto de hidratación a maiores pero resultou que non. Hai que mellorar ese punto e aínda que só sexa líquido non telas no chan nin ao sol.

🏆 Clasificación Xeral Homes 🏆

Tan só 4 días despois de participar na Carreira Camiño das Letras que me deixou cunhas maniotas que xa non lembraba. Tocou desprazarse ata Portosín para participar no XToSín Trail 2023 sobre unha distancia de 21Km e preto de 1000m+. 

O obxectivo sería:

O percorrido moi distinto a cando o fixen no 2018 xa que a saída xa era cara o outro lado e naquel ano a distancia fora de 14Km. Nada máis saír imos un pouco por asfalto o que axuda a estirar o grupo de corredores ata que chegamos a Praia de Coira e imos correndo pola area. Cando remata a praia xa comezamos a subir en fila de un, outro pequeno tramo de praia e a subir agora si sen descanso ata o Iroite sobre o Km 7. Subida moi dura na última parte que os do trail curto non tiveron que facer. Dende aí practicamente o máis duro estaba feito sempre queda algún repeito por aí que segundo van pasando os km se van facendo mais duros pero nada comparado a eses primeiros km. Houbo unha zona moi chula baixando por un bosque que me encantou, rápida, non moi técnica e estábase fresco. Resumindo saída pola praia, subida sen descanso ata o Km 7, zona para correr ata o Km 12 e baixada cara meta con algún repeito sorpresa.

En canto a carreira bastante ben, zona para aparcar relativamente fácil pola zona do porto e arredores, voluntarios nalgún cruce e axudaban tamén nalgunha subida, dous avituallamentos intermedios completos, o avituallamento final moi completo, boa marcaxe do percorrido aínda que houbo algunha zona que era un pouco máis complicado seguir as marcas porque non se vían ben cando só estaban no chan e agasallo dunha viseira que se agradece máis que outra camiseta.

O peor foi a hora da entrega de dorsais que foi moi lenta, descoñezo o motivo porque en Ribeira foi bastante rápida e a duchas que quedaban algo lonxe máis ou menos a 5 minutos en coche, descoñezo se hai outras máis preto pero eu preferín achegarme ata a praia.

🏆 Clasificación Xeral Homes 🏆

Tras sufrir nos 10000 Peregrinos, había que volver ao monte para desconectar e tocou desprazarse ata O Pino para participar no Trail Comarca do Ulla - Tambre sobre unha distancia de 18Km e 750m+, con saída dende a Area Recreativa de Brandelos (Touro) e meta en O Pedrouzo (O Pino). Esta proba xa a fixen o ano pasado e na que conseguín chegar ao podio inesperadamente pero que non puiden subir porque xa estaba na casa.

O obxectivo sería:

O resultado final foi:

O percorrido rápido sen moitas zonas técnicas, con eses primeiros km pegados ao rio que hai que ir en fila de un, ata que comezamos a subir ao Miradoiro do Couto de San Sebastián. Tras a subida, baixada forte e zona para correr con algunha subida curta pero intensa ata chegar a última subida no Mirador do Picón, dende aí xa terreo favorable ata que no último km collemos asfalto en subida para chegar a meta. Houbo cambios respecto ao do ano pasado e para min case me gustaba máis o do ano pasado.

En canto a carreira bastante ben, había servizo de autobús para levarnos ata a saída aínda que non sei que pasou aí que dimos un par de voltas antes de poder poñer rumbo cara a saída e despois que o chofer se equivocou nun cruce pero chegamos a tempo. Servizo de gardarroupas na saída. Percorrido moi ben marcado incluso en algún punto en exceso. Dous avituallamento intermedios, o primeiro deles liquido e o segundo completo. O avituallamento final completo ademais de que había callos e cervexa. Servizo de fisioterapia e camiseta de agasallo. O que menos me gustou e que se podería mellorar e no tema das duchas xa que nos mandaron as que máis lonxe quedaban e había que ir en coche, tendo outro pavillón e campo de fútbol máis preto.

🏆 Clasificación Xeral Homes 🏆

Asuntos pendentes tiña con esta proba e é que no 2021 cando me enfrontei ao Campionato Galego de Trail que tamén se celebraba en A Pobra do Caramiñal, rebentei como unha castaña. Primeiro seguramente non estivese preparado e segundo o día caloroso e avituallamentos que aparecen 5Km despois do indicado. Este ano a distancia era maior xa que había que correr 25Km e 1200m+ pero xa viña facendo máis trail para chegar en mellores condicións, o único inconveniente era que o día anterior participei noutra proba e claramente as pernas non estaban ao 100% pero aí vamos.

O obxectivo sería:

O percorrido mudou respecto o 2021 e creo que o de este ano era máis duro ademais de que a distancia tamén foi maior. Os primeiros 3,5 Km moi rápidos xa que íamos baixando pero había que ir con moito tino xa que íamos saltando polas pedras. Rematada a baixada viñeron dúas subidas duras e logo íamos pola ladeira da Curota ata chegar ao lugar da saída, Km 6,3. Dende aí outra vez terreo favorable e onde había unha forte baixada que me castigou moito as pernas ata chegar a subida do rio Pedras xa polo Km 10,2. Esta subida sería máis ou menos de 1Km e case nos últimos metros chegariamos a un dos avituallamentos e onde se separaba a carreira longa da curta. A partir de aquí foi un continuo sube e baixa constante sen moita dificultade ata a última subida dura no Km 2,3 ata o Km 21. Rematada esta subida practicamente xa era todo favorable ata meta agás algún pequeno repeito que quedaba por aí e chegar a meta tamén cunha pequena subida.

En canto a carreira, fíxose control de material obrigatorio que polo normal nunca se mira. Voluntarios nalgún cruces e puntos conflitivos. A marcaxe do percorrido foi correcta aínda que había un punto no que tiven dúbidas se ía ben porque nos carteis poñía "trail curto" pero estaba tachado cunha cor transparente e daba pé a confusión. Os avituallamentos intermedios e finais completos. Duchas lonxe pero eran as que máis preto quedaban e agasallo dunha mochila/saco. 

Houbo uns puntos que creo que se poderían mellorar como o de poñer no regulamento que ía facer falta o DNI para recoller o dorsal xa que moitos corredores non o tiñan encima e tiveron que volver ao coche para poder recollelo. Igual cambiar o lugar da saída porque o tramo de asfalto quédase curto para estirar o grupo e entrar na primeira zona de montaña xa que había que ir saltando entre pedras e foi perigoso con corredores buscando tamén adiantar. O último avituallamento igual retrasalo un pouco ata rematar a subida do Alto da Lagoa xa que onde estaba que era o mesmo punto do segundo dos avituallamentos só restaban 3Km para meta e había que desviarse uns metros para poder ir ata el.

🏆 Clasificación Xeral Homes 🏆

Despraceime ata o Concello de Ames, concretamente ata as instalacións do Aeroclub de Santiago onde esta a meta e entrega de dorsais do IV Trail Ribeiras do Tambre. Dende aí teríamos que coller un autobús ata a saída en Ponte Maceira e completar unha distancia duns 16 Km aprox. e un desnivel positivo de 400m.

O obxectivo sería:

O resultado final foi:

O percorrido igual que o ano pasado moi rápido xa dende a saída porque hai que coller sitio para facer o tramo polo sendeiro pegados ao río xa que é complicado adiantar a non ser que che deixen pasar. Polo Km 6,5 separámonos do río para adentrarnos un pouco no monte sobre 2Km e volvemos de novo ao río ata a praia fluvial de Tapia onde estaba o avituallamento. Xa dende aí comezamos a subir cruzando varias veces o Rego da Anduriña e facemos cumio a escasos metros de chegar a meta a onde chegamos tras unha baixada técnica.

En canto a carreira bastante ben, había opción de trail ou andaina, zona para aparcar, servizo de autobuses ata a saída, gardarroupas na saída, avituallamento intermedio e final completo, duchas ao carón da meta e agasallo dun portadorsais. O único que hai que mellorar foi o de comprobar as pontes de madeira que tivemos que cruzar xa que o compañeiro de equipo que viña detrás miña, tras pisar un dos paus, rompeu e por sorte non meteu o pé porque podía ser moi perigoso

🏆 Clasificación xeral homes 🏆

Tiña ganas de facer este trail xa o ano pasado cando se estrenuo pero por calendario non puiden asistir. Este ano puiden participar no II Trail Cova da Bruxa, organizado polo club Serres Runners, con dúas distancias a escoller, anotándome a distancia longa de 22Km e 1100m+ aprox. Este ano tamén participaba neste proba Pablo Villa, atleta profesional do Adidas Terrex, gañador da Transgrancanaria, Salomon Ultra Pirineu, UTMB Mont-Blanc...

O obxectivo sería:

O percorrido foi bastante esixente dos máis duros que fixen, unha primeira parte moi bonita antes de irnos adentrando no monte e despois houbo un par de subidas moi duras sobre todo a última delas que ademais parecía que non tiña fin. As correspondentes baixadas tamén moi técnicas e se isto non era suficiente a última parte polo río tamén moi técnica ata tivemos que facer rápel para baixar... Aínda así paseino mellor pola zona do río que nas subidas e baixadas polos montes e iso que non se me dá nada ben ir polo rio. Unha mágoa que o día estivese con toda esa néboa porque estou seguro de que nos perdemos unhas incribles vistas polo que tocará repetir para poder desfrutar desta proba ao 100%.

En canto a organización estivo todo moi ben, con dúas distancias a escoller entre 22 e 13 Km e unha andaina de 11 Km ademais de carreiras para os menores. Zona para aparcar os corredores, Servizo de gardarroupas, voluntarios nalgún punto conflitivo, animación coas bruxas pandeireteiras, dous avituallamentos intermedios moi completos, o final igual moi completo, marcaxe do percorrido perfecta, duchas ao carón da meta aínda que aquí hai un punto negativo xa que non había auga quente. Agasallo dunha camiseta técnica e bolsa gym-sack

🏆 Clasificación xeral homes 🏆