Tras pasar toda a semana con gripe e adestrando daquela maneira houbo que disputar a última proba do Circuíto de Carreiras Arousa Norte #4C1M despois de competir en A Pobra do Caramiñal, Ribeira e Rianxo, tocou desprazarse ata Boiro onde se ía celebrar a XII Carreira Popular Mar de Boiro – X Memorial “Pepe Buceta” sobre unha distancia de 10 Km. 

Chegaba cos obxectivos de seguir coas boas sensacións das últimas carreiras, baixar o tempo do ano pasado que está en 37:25 e en canto a clasificación do circuíto, intentar quedar o mellor posible xa que estou a 9 puntos do 3º clasificado da categoría. 

Unha vez cheguei a Boiro, fun cara a zona de meta para ver o gran ambiente que había, mentres esperaba a que fose a hora de poñerse a quecer dáme tempo a ver a carreira da categoría dos nenos. Chegada a hora póñome a quecer e as sensacións xa non eran moi boas pero había que probar a ver que se daba feito.

Dáse a saída e arranco ben, a primeira parte da carreira, a fácil, que transcorre por Boiro e polo paseo era todo terreo favorable para ir rápido e así vou, mantendo un ritmo alto e gañando posicións. Unha vez abandonamos o paseo comezou un sube e baixa que duraría o resto da carreira. 

Ata o km 5 todo ía ben mantendo o ritmo nun grupo pero pouco a pouco me ía sentindo coas pernas máis cargadas e notándome sen forza. Nese punto marco un tempo de 18:37 minutos que equivale a un ritmo de 3:43 e pasei no posto 48º.

Intentei incrementar o ritmo para dar caza aos corredores que levaba por diante pero pouco aguantei e empeceime a sentir mal, falta de aire, e nada de forzas para aguantar o ritmo forte. Houbo que levantar o pé, ademais o flato estaba ameazando e tiña algo de dor pola zona abdominal. 

A partir do km 7 esa dor foi a máis e xa non daba corrido a un ritmo competitivo e comezábanme a adiantar por todos lados e aínda quedaba o peor a última costa que era a máis importante da carreira. 

Chegados a ese punto estiven a piques de poñerme a andar porque as pernas parecían que non aguantaban máis pero aguantei e xa só quedaba chegar a meta tranquilo ou iso foi o que pensei. 

Cando quedaban 500 metros para meta a xente seguíame adiantando e dixen para min que hoxe non era o día e non tocaba sprintar para chegar como puidese pero de repente como se o que dixera non tivera importancia, véxome con forzas e comezo a sprintar dende 300 metros antes de chegar a meta para dar a sorpresa e gañar algún posto para sorpresa miña un dos atletas ao que estaba adiantando tamén se pon a sprintar a miña par e facemos os 300 metros como se estivésemos disputando o primeiro posto. Xa facía moito tempo que non sprintaba tanto nin a esa velocidade, sentía que as pernas me ían no aire e que aí estaba o límite da miña velocidade. Chegamos a meta xuntos e ríndonos polo sprint tan largo e duro que fixemos. 

A min a risa duroume pouco xa que ao parar comeceime a marear, os compañeiro de carreiras falábanme e eu apenas daba falado e estiven apiques de vomitar polo esforzo que fixen e despois parar pero pouco a pouco me fun recuperando e quedou nunha anécdota.

Os obxectivos, non se deron cumprido xa que as sensacións non foron nada boas coa sensación de ir coas pernas cansadas e faltándome o aire, fixen 1:46 minutos máis que o ano pasado, parece que a gripe fixo estragos en min... o único que puiden salvar foi a clasificación na categoría pero non por méritos propios, senón que a ausencia ou o non remate da proba do primeiro clasificado senior fixo que quedase eu en 3º posición.  

En canto a carreira, coma tódolos anos moi ben organizada, con globos de tempo, vixilancia nos cruces, bo avituallamento final... o peor esa costa final que esnaquiza a un pero que fai dunha carreira única. Para o ano intentarei regresar, mellor preparado para bater o meu tempo.  

Clasificación xeral mulleres:

1. Rocio Alvite Ferreiro ........................ 38:02
2. Natalia Lorenzo Perez ...................... 41:10
3. Lara Buig Fernandez ........................ 41:49