Tras correr o día anterior a CorreSan Ponte Mantible - Vite, tocou a quenda da última proba do Circuíto ArousaNorte, a XIII Carreira Popular Mar de Boiro, sobre unha distancia de 10 Km e co trazado das últimas edicións.

Os obxectivos serían:
  • Desfrutar da carreira e seguir coas boas sensacións das últimas carreiras
  • Intentar gañar algún posto na clasificación xeral do circuíto aínda que vai estar moi complicado.
Unha vez cheguei a Boiro fun cara a saída para poñerme a quecer porque volvín chegar co tempo xusto. Tras un trote duns 10 minutos, somos chamados para a saída onde me coloquei bastante adiante e dáse a saída. Arranquei ben que non é moi normal, mantendo e incluso gañando posicións. 


Como a saída era favorable nos primeiros metros iamos todos moi rápido, incluso por todo o paseo da Praia de Barraña, onde fun metido nun grupo mantendo ese ritmo alto e así foi como o primeiro km me saíu a 3:23 min/km, ritmo que non son capaz de aguantar durante toda a carreira pero todo chegará.


Deixando o paseo atrás viña a diversión da carreira un sube e baixa practicamente continuo, non moi forte pero que xa tiñas que ir modificando ritmos para non cargar moito as pernas.

Pouco a pouco fun deixando o grupo no que estaba atrás e dende o km 3 quedeime só, de vez en cando miraba cara atrás para ver a diferencia que tiña para saber se apertar máis ou menos porque por diante non era capaz de alcanzar a ninguén, ao levar un ritmo igual ao meu a distancia foise mantendo todo o tempo.

Ao paso polo km 7, tras rematar a subida do campo de fútbol de Abanqueiro foi cando comprobei as sensación que estaba tendo porque os últimos dous anos (2016 e 2015), entorno a ese punto foi cando rebentei e non puiden acabar a carreira como a min me gustaría pero este ano estaba sendo distinto, atopábame bastante ben, xa comezaba a notar o cansancio nas pernas pero o esforzo do ritmo que estaba levando tiña que notarse algo.

Quedaba a peor parte da carreira, xusto no km 9 comezaba unha dura subida de 300 metros aprox. onde se chegas xustos de forza o pasas mal. Este ano fun controlando que non me alcanzasen e ía subindo rápido e ben, non se me fixo moi dura. 
Tras subir, sempre toca baixar e así foi, encaramos unha forte baixada para logo correr pola rúa peatonal ata chegar a meta onde gracias a toda a xente que había alí animando, chego sen perder forzas, nin posición.


O resultado final foi:
  • Posición xeral: 22º de 291.
  • Posición categoría: 6º.
  • Tempo: 36:30 min.
  • Ritmo: 3:39 min/km
Os obxectivos ao 50% xa que non conseguín gañar ningún posto na clasificación final do circuíto pero manteño a que tiña, un 6º que non está nada mal. Desfrutei moita da carreira da que despois de dous anos pasando mal púidena acabar tirando de principio a fin e como consecuencia mellorar o tempo que tiña nesta proba nuns 55 segundos, algo que non o tiña previsto despois de correr o día anterior.

🏆 Clasificación xeral homes 🏆
  1. Juan Antonio Gude Vila ...... 32:05
  2. Amador Pena Torreira ......... 32:53
  3. Jose Lojo ................................. 32:57
🏆 Clasificación xeral mulleres 🏆
  1. Rocio Alvite Ferreiro ............... 38:41
  2. Elena Matalobos Redondo ...... 41:42
  3. Teresa Carneiro Barroso ......... 42:15
PD: Clasificación xeral. Fotos cortesía de Marcos Creo (La Voz de Galicia) e José Navarro. Moitas gracias.
Tocou disputar a última proba do Circuíto de Carreiras CorreSan de Santiago de Compostela. Desta vez nunha proba nova que transcorrería pola Ponte Mantible - Vite. Nun percorrido de dúas voltas ata completar a distancia de 5,9 Km.

Os obxectivos serían:
  • Intentar gañar algunha posición na clasificación final xa que practicamente descarto o podio porque vou 8º a 19 puntos/posicións do 3º clasificado.
  • Desfrutar da última proba deste circuíto e a ver que tal esta nova proba.
Cheguei a Santiago co tempo xusto para quentar e poñerme na saída pero todo se truncou nada máis aparquei e me puxen a cambiar. Por primeira vez esquecéuseme o dorsal na casa. Rapidamente fun a onde se entregaban os dorsais a ver se había algunha solución, de alí mandáronme a que falase cos xuíces da federación onde me comunican que tras abonar unha cantidade de 3€ me facilitaban un novo dorsal. Unha vez alí xa me daba igual, só quería correr, polo que pago e tras un erro meu a hora de dicirlle que número de dorsal tiña queda todo solucionado.
Ao saír da furgoneta da federación fun acabando de cambiarme e poñendo rumbo a saída xa que era a hora de comeza e eu aínda non quentara nada co frío que estaba facendo.

Coloqueime na parte de adiante xa que aínda que ía sen quecer os obxectivos ían ser os mesmo e dáse a saída. Arranco mal, perdendo posición sen ser capaz de seguir a xente, estábame custando entrar en calor e así paso o primeiro km no que predominaban as pendentes non moi fortes pero notábase cando subías.


Mentres fun collendo ritmo de competición, pasamos polo que será o punto de meta e posiblemente a zona máis interesante do percorrido, a Ponte Mantible. Lugar que non coñecía e que está bastante ben para dar un paseo.


Deixando a Ponte Mantible atrás e seguimos subindo cara o aparcadoiro de Salgueiriños onde dariamos a volta. Pouco a pouco vou collendo ritmo e gañando posicións pero non conseguía ver os 'rivais' dos circuíto polo que había que seguir tirando forte.


Comecei a segunda volta e voume quedando só, sen ninguén que me alcanzara por detrás e sen dar caza a ninguén por diante pero seguía tirando forte intentando alcanzar a alguén para polo menos, gañar algún posto máis e quedar con bo sabor de boca.


No último km consigo chegar a altura doutro corredor que vou deixando atrás aínda que me custa un pouco. Xa só pensaba en chegar a meta o máis rápido posible e fago un último esforzo coa recompensa de gañar un posto máis a falta de 100 metros para finalizar a proba.


O resultado final foi:
  • Posición xeral: 29º de 318.
  • Posición categoría: 10º.
  • Tempo: 20:27 min.
  • Ritmo: 3:28 min/km.
Os obxectivos cumpridos. Gañei un posto na clasificación do circuíto  para quedar 7º da categoría a 23 puntos/posicións do 3º clasificado. Desfrutei da proba a pesar de saír en frío e apurado ao ser carreira nova sempre vas mirando a ver con que te atopas e foi unha proba entretida. 

En canto a esta nova proba está ben pero non me acabou de gustar de todo, sobre todo na zona do aparcadoiro que estaba moi solitaria. 
Sen dubida a mellor proba do circuíto a Ruta dos Parques e por encanto e maxia a Nocturna Cidade Vella.

🏆 Clasificación xeral homes 🏆
  1. Diego Alonso Campo ........... 17:54
  2. Amador Pena Torreira .......... 18:08
  3. Cristián Muiño Varela .......... 18:21
🏆 Clasificación xeral mulleres 🏆
  1. Raquel Suárez Pedrosa ......... 20:53
  2. Mónica Álvarez Alonso ........ 22:09
  3. Noelia Papín Estévez ............ 22:23
A piques de facer tres anos como atleta no equipo C.D. Pinarium, aínda non puidera participar na carreira que organizan pero chegou o día de comprobar a dureza da que tanto se di e participar na VIII Carreira Pinga-Pinga, sobre unha distancia de 7,3 Km dando tres volta ao percorrido marcado.
Todos os anos fan unha homenaxe, esta ano tocoulle ao piragüista Pontevedrés Óscar Graña, con un gran palmares de 12 medallas en Campionatos Mundiais e 9 medallas en Campionatos Europeos.

Os obxectivos serían:
  • Manter as boas sensacións e o bo rendemento que conseguín a semana pasada.
  • Desfrutar da proba do equipo.
Unha vez que conseguín chegar coa axuda do GPS, xa que senón era moi probable que non dera chegado, fun recoller o dorsal e esperar que fose o momento de cambiarse para poñerse a quecer, nunha maña que estaba sendo bastante fría xa que o sol non acaba de quentar. 

Antes de seguir coa miña participación nesta proba teño que dicir que antes que dera comezo a nosa proba, foi a quenda para os da andaina que terían un percorrido de 5 Km na que meus pais participaron e as súas impresións foron: unha zona moi bonita e tranquila pola que poder andar, indo pola beira dun riachuelo e moi ben sinalizada. Houbo un tramo polo cal tiñan que ir por encima duns palets polas chuvias dos días anteriores e que deixaron a zona con algo de barro e algunha pequena pendente que miña nai lle custou máis pero que repetirían seguro xa que é unha boa forma de coñecer e pasar o tempo mentres eu estou a correr.

Chegou o momento de poñerse a quecer e xa fun coñecer o percorrido e as súas pendentes para ir comprobando ao que me tería que afrontar. Quedoume claro que non se podía saír moi forte porque senón na última volta o ía pasar mal. A subida era das de ter que reducir marchas no coche para subir e todo tiña pinta de ser un subir e baixar continuo polo que a carreira é rompe pernas.

Na saída coloqueime na zona media tirando cara atrás, aínda que a carreira era curta, na subida sabía que podía recuperar ben os postos. Dáse inicio a proba dentro do campo de fútbol, onde teriamos que dar unha volta e saír para encarar as tres voltas do circuíto.


A primeira volta fíxena como recoñecemento do percorrido e é que tiña algunha sorpresa máis porque cando fun inspeccionar o percorrido só subira a primeira das pendentes xa que unha vez subías esta, viña unha zona llana e logo outra subida moito máis pequena que a anterior pero que tamén lle chegaba ben de dureza. A partir de aí xa era terreo favorable ata uns 500 metros antes de terminar a primeira volta na que se comezaba a subir de novo. Durante toda a primeira volta fun gañando postos, sobre todo na subida, supoño que ao ser peso pluma, subo mellor.


A segunda volta foi máis de transicións e intentei manter un ritmo constante, pensando seguido en que tiña que gardar algo para a última volta, que senón o ía pasar mal na subida. Seguín gañando postos e as sensacións eran moi boas.


A terceira e última volta a pesar de reservar un pouco para esa última subida, que larga se me fixo, pensei que non se acababa nunca pero pasiño a pasiño foise subindo e xa só quedaba baixar, onde fun intentando pillar ao corredor que levaba por diante para non deixarme levar e unha vez que volvemos a entrar no campo de fútbol para dar a volta ata a meta consigo alcanzalo e chegar a meta xunto co compañeiro de equipo, Íñigo Martínez.
 

O resultado final foi:
  • Posición xeral: 19º de 153.
  • Posición categoría: 7º
  • Tempo: 28:09 min.
  • Ritmo: 3:51 min/km
Os obxectivos cumpridos, desfrutei moito da carreira xa que non che da tempo a aburrirte, ou estás subindo ou estás baixando polo que é deses rompe pernas. As sensacións foron moi boas e o rendemento tamén a pesar de notar na última volta a falta de adestramento pero pouco a pouco vou collendo o punto outra vez xa que estou cambiando o tipo de adestramento a ver se así evito mellor as lesións e consigo mellorar máis.

En canto a carreira un traballo perfecto e moi ben organizado, non é porque organice o equipo no que estou pero para min non lle faltou nada, percorrido ben marcado, avituallamento intermedio e final moi completo, camiseta de agasallo para os corredores, andaina gratuíta, animación para os rapaces e parte solidaria, xa que 1€ da inscrición ía doado integramente a Asociación Española Contra o Cancro

Para rematar tiven que subir a recoller o trofeo de 2º clasificado no Km Pinarium que é un concurso entre os membros do equipo no que imos puntuando por cada carreira que facemos ao longo do ano e que este ano estivo moi reñido xa que o vencedor, Manu Sobral, conseguiu a vitoria por 9 puntos de diferencia comigo, sendo o terceiro clasificado, Manu Lorenzo. Parabéns aos dous e a ver se para o ano sempre que as lesións me respecten poida conseguir o primeiro posto.


🏆 Clasificación xeral homes 🏆
  1. Luis Figueroa ............................ 24:07
  2. Álvaro Prieto Fervenza ............ 24:43
  3. Amadeo Abal Chaves ................ 24:58
🏆 Clasificación xeral mulleres 🏆
  1. Tania Domínguez Ferreira ....... 33:11
  2. Marga Villaverde Rosales ......... 34:13
  3. Ángeles Iglesias Santiago ......... 34:31
Tras tres semanas sen adestrar por molestias tocou volver a competir nunha das carreiras máis multitudinarias de Galicia, a San Martiño de Ourense, xa na súa XLI edición e na que teriamos que percorrer un recorrido de 10 Km homologados.

Os obxectivos serían:
  • Recuperar ritmo e sensacións despois do parón para mellorar das molestias que arrastraba.
  • Desfrutar do gran ambiente que sempre hai nesta proba.
Cheguei xusto de tempo porque co frío que estaba a facer, custoume máis da conta saír da cama pero foi chegar a Ourense, cambiarme e poñerme a quecer sen perder tempo porque senón non chegaba para a saída.
A falta de 10 minutos para que dera comezo a proba xa me coloquei no caixón correspondente, aínda que non estaba para ir moi rápido debido a que non sabía como ía estar fisicamente, coloqueime como se fora a por marca pero sabendo que non era o día.

Deuse a saída e comezoume a adiantar bastante xente a pesar diso, intentei non perder moito tempo. Os dous primeiros km's paseinos regular xa que non conseguía entrar en calor, incluso en momentos me doían as mans do frío que tiña e fun abrindo e cerrando as mans para intentar facer circular o sangue.


Tras eses dous km's comezo a entrar en calor e a comezar unha remontada , intentaba manter un ritmo constante e rápido xa que as sensacións que estaba tendo eran moi boas, o único que me estaba molestando era respirar o aire frío. 

Mentres seguía gañando postos cheguei ao km 5, onde estaba situado o punto de control e o avituallamento intermedio, do cal, como é habitual paso. Polo paso de control fago un tempo de 18:54 min. que equivale un ritmo de 3:47 min/km e pasando no posto 173º. Bastante ben sabendo que chegaba sen prepararme ben e sen saber como ía estar muscularmente.


En torno ao km 7,5 a falta de adestramento comezouse a notar e xa non me notaba tan ben como antes a pesar diso seguía gañando algún posto.


Nos últimos metros miro o reloxo e vexo que non ía conseguir marca polo que me deixo levar na recta de meta e como conseguinte perdín un par de postos pero satisfeito co rendemento e carreira que fixen.


O resultado final foi:
  • Posición xeral: 165º de 3673.
  • Posición categoría: 63º.
  • Tempo: 37:22 min.
  • Ritmo: 3:45 min/km.

Os obxectivos superados, non contaba con facer este tempo xa que pensaba que tres semanas se ían notar e me ía ir a un tempo de 39 min. aprox. indo en carreira arrastras, notando que quería ir máis rápido pero que fisicamente non daba e finalmente non foi así e sentinme bastante cómodo durante a carreira e con boas sensacións para o que queda de ano.

🏆 Clasificación xeral homes 🏆
  1. Alejandro Fernández Rivera ....... 30:41
  2. Alejo Ares Prada ......................... 30:44
  3. David Santos Domínguez ........... 30:54
🏆 Clasificación xeral mulleres 🏆
  1. Marta Casanova Vázquez ............ 34:47
  2. Ester Navarrete Santana .............. 35:14
  3. Sandra Mosquera Losada ............ 36:13
Tras participar o día anterior no VI CorreSan Ruta dos Parques, hoxe era a quenda de facer a despedida do trail por este ano, xa que o que queda de ano só estarei correndo en asfalto. Despraceime ata o Concello de O Pino, concretamente O Pedrouzo onde se celebraba o III Trail Senda do Picón (14 Km).

Os obxectivos serían:
  • Intentar chegar ao podio xa que non somos moitos pero si de calidade.
  • Desfrutar do último trail do ano.
Unha vez cheguei O Pino, fun recoller o dorsal e como fun con tempo suficiente tiven tempo de ir tomar un té negro. Chegado o momento acabeime de cambiar e púxenme a quecer con Sergio Requeijo, compañeiro de carreiras.
Rematado o quecemento e antes de colocarnos na saída fixemos unha foto cuns compañeiros do mundo do trail cos que me levo moi ben.


Tras a foto, había que centrase xa na carreira. Estaba con ganas de comezar a correr e coloqueime nunha segunda/terceira fila para saír co grupo de adiante. Despois da explicación, deuse a saída onde como non, vou perdendo posicións e non porque se saíra moi rápido senón porque eu non daba ido mellor, as molestias sobre todo ao estirar a perna eran evidentes e estábame custando coller ritmo.


Os primeiros 2,5 km's eran favorables, costa abaixo, aínda que había un tramo pola zona dun riachuelo onde estaba todo moi esvaradizo e sen desbrozar moito porque me piquei con todo o que había... incluso case quedo sen zapatilla xa que me quedou enganchada entre as raíces, por sorte puiden sacar rápido o pé e non perdín tempo. As molestias coas que comecei pouco a pouco ían remitindo e xa ía entrando en calor.


Tras ese "mal" comezo, onde tiña molestias detrás do xeonllo esquerdo, comezamos a subir e fun recuperando todas esas posicións que perdera no comezo. Mentres subía non paraba de dicirme "pasos curtos e a ritmo" mentres había forza había que aproveitar.

Chegamos ao primeiro avituallamento situado no punto máis alto, xa no km 6,5 onde como é habitual en min non paro, facía frío e non me apetecía nada só seguir correndo e gañar máis postos.


Tras o avituallamento comezamos unha baixada por unha pedras, estando en condicións de seco podíase ir moi rápido pero houbo que tomar máis precaucións para non esvarar ata chegar de novo ao camiño.

Xa por pistas as molestias desapareceran de todo e comecei a rodar rápido algo que non tiña pensado facer, collo a un grupo que ía por diante e vou con eles. Pasamos por unha zona de "rio" onde a auga case nos daba pola cintura, case era mellor botarse a nadar porque as pedras de abaixo non era que tiveran moito agarre.

Sobre o Km 14 aprox. saímos a un cruce onde collín a dereita, de repente vexo como os corredores que levaba por diante veñen de volta polo que, camiño erróneo, menos mal que só foron 20 m. os que me equivoquei.

Volvemos ao camiño correcto e aínda quedaba pasar por outra zona de "rio" onde se esvaraba moito e a terra estaba moi solta, non había moito agarre, apiques estou de caer varias veces pero que finalmente non pasa nada.


Acabamos a zona de monte e volvemos a coller o camiño, mentres se comezaba a subir constantemente, eu miraba o reloxo e vía que xa debía quedar pouco, polo que sabía que no último tramo en asfalto tiña que ser o meu forte para poder gañar algunha posición máis e así foi, mentres subiamos o compañeiro de carreiras Mario, adiantoume. A min a costa estábaseme facendo longa pero xusto cando me adianta intento seguirlle o ritmo para atacar cando chegaramos ao asfalto. Chegamos e fixen un cambio de ritmo para adiantalo e sacarlle vantaxe, el intentoume seguir e pensando que non me ía xa dar caza comezoume a sprintar, cando o vin tamén empecei o meu sprint onde finalmente quedo por diante del pero co mesmo tempo en meta.


O resultado final foi:
  • Clasificación xeral: 7º de 73.
  • Clasificación categoría: 2º 🏆
  • Tempo: 1:11:21
  • Ritmo: 5:05 min/km.

Os obxectivos cumpridos, finalmente conseguín chegar ao podio pero posiblemente gracias a que os catro primeiros no cruce que eu me confundín a eles pasoulles o mesmo pero chegando a percorrer uns 700 metros de máis. Desfrutei bastante da proba sobre todo cando me pasaron as molestias e puiden comezar a correr máis comodamente.

En canto a carreira, ben organizada o problema que houbo nese cruce creo que non foi debido a organización senón ao rápido que se ía ahí porque unha vez que mirabas, as cintas víanse ben. Trail rápido e sen subidas das que unha vez arriba tes que recuperar o alento pero que para a xente que queira comezar neste mundo é perfecto.
¡Non vai ser todo cortalumes para arriba e cortalumes para abaixo, que non todos somos carneiros, nin cabras!

🏆 Clasificación xeral homes 🏆
  1. Rubén Insua Díaz ................... 1:08:44
  2. Juan Elosua Capellán ............ 1:08:55
  3. Victor Maneiro Freire ............ 1:08:55
🏆 Clasificación xeral mulleres 🏆
  1. Verónica Calvo ......................... 1:29:14
  2. Miriam Palomanes Atanes .... 1:29:34
  3. Teresa Carneiro Barroso ........ 1:31:32
PD: Clasificación completa. Fotos cortesía de: Trail Galicia - GZ TrailConcello de O Pino. Moitas gracias.