Tocaba disputar a segunda das probas do Circuíto CorreSan de Santiago de Compostela, neste caso sería a proba Ruta da Prata en Angrois sobre unha distancia de 5,2 Km, nun percorrido de dúas voltas.

Os obxectivos serían:
  • Mellorar o tempo acadado o ano pasado de 19:30 minutos.
  • Quedar no mellor posto posible para a clasificación do Circuíto CorreSan.
  • Esperar que as molestias que teño na zona abdominal inferior non me molesten moito ao correr.
Unha vez cheguei a Angrois, espero o momento de cambiarme e poñerme a quecer, mentres vexo a carreira das categoría inferiores.
Chegado o momento, púxenme a quecer e as molestias na zona abdominal eran fortes polo que intentei quecer ben para que non me molestasen en carreira. Pouco a pouco a dor foi diminuíndo e cando tocou ir para a saída, apenas notaba nada.

Coloqueime bastante adiante nunha terceira/cuarta fila, ía saír rápido e tirar ata onde puidese. Dáse a saída e comezo ben sen perder moitas posición e comezando a recuperalas rapidamente.

Foto: RunPhotos Galicia
Así foi toda a primeira volta tirando seguido e intentando manter un ritmo forte, a calor que facía provocaba que aparecera o cansancio antes e ata facía falta algún posto de avituallamento porque levaba a boca seca de todo. No primeiro paso por meta fago un tempo de 9:23 min. que equivalen un ritmo de 3:37 min/km. Sentíame moi ben co ritmo e quitando a sequidade que levaba na boca as pernas estaban moi ben e me vía capacitado para tirar un pouco máis. 

Foto: RunPhotos Galicia
Comecei a segunda e última volta apertando o ritmo para intentar deixar atrás a os corredores cos que ía, algún conseguino deixar pero outros fóronme aguantando detrás. Mentres seguía tirando na primeira metade desta volta (a parte que ten as subidas) fun gañando algún posto e aínda que comezaba a aparecer o cansancio, intentei seguir apertando pensando na clasificación do circuíto.

Foto: Koala36 Retratografía
A segunda metade da volta (case todo o tempo baixando), sentía como as pernas non podían máis e escoitaba como por detrás me seguían de preto. Decido comezar a dar todo o que me quedaba a falta de 500/400 metros, error meu xa que cando faltaban 200 metros xa non daba apertado máis e perdín dúas posicións. 

A falta de 150 metros de chegar a meta e en pleno sprint produciuse a anécdota/susto por parte dun dos corredores que me estaba a adiantar do Noitebra xa que tamén estabamos comezando a dobrar a outros corredores e o xuíz que nos separaba para non ir polo mesmo camiño, indicándolle ao corredor no noitebra que fora cara o outro lado e nese momento produciuse o choque entre corredor e xuíz, tendo que frear para non caer. Nese momento sen pensalo decido pararme eu tamén e non aproveitarme da situación e cederlle a posición que xa tiña gañada. O corredor que viña por detrás miña tamén decide parar e entramos os tres respectando as posición na que íamos antes de se producir o accidente e rematando a proba facendo nesta última volta un tempo de 9:18 min. que supón un ritmo de 3:35 min/km.

Foto: Sandra Alonso (La Voz de Galicia)
O resultado final foi:
  • Clasificación xeral: 14º de 289.
  • Clasificación categoría: 3º 🏆
  • Tempo: 18:41 min.
  • Ritmo: 3:36 min/km.
Os obxectivos cumpridos, mellorei 49 segundos respecto a carreira do ano pasado, conseguín chegar 3º da categoría que para a clasificación do circuíto pode ser que teña posibilidades sempre é cando aguante a este nivel, as dores da zona abdominal non apareceron en carreira e quedan satisfeito co comportamento que tiven nada máis ver o acontecido co corredor do Noitebra e o xuíz que me agradecerían despois.

Foto: Facebook do Noitebra
🏆 Clasificación xeral homes 🏆
  1. Amador Pena Torreira ................ 17:17
  2. Arturo Ramos Rey ...................... 17:25
  3. Alberto Carou Carril ................... 17:30
🏆 Clasificación xeral mulleres 🏆
  1. Raquel Suárez Pedrosa ............... 20:58
  2. Laura González Gión .................. 21:45
  3. Lorena Pose Varela ..................... 22:15
Desta vez tocou desprazarse ata Curro (Barro), onde se celebraba a II Carreira Solidaria Montes de Curro, a favor da Asociación de Rescate Animal Cadeliños onde o recadado irá destinado a recollida, alimentación e atención veterinaria dos animais da asociación. O percorrido sería duns 15 Km por sendeiros e un tramo de asfalto.

Os obxectivos serían:
  • Intentar chegar ao podio dada a pouca inscrición deste ano.
  • Desfrutar o que poida do ambiente e paisaxes.
Unha vez cheguei a zona da saída (menos mal que estaba ben indicado senón seguro que me perdía), fun recoller o dorsal e esperar a que chegase a hora de cambiarse para poñerse a quecer un pouco, mentres fun saudando aos compañeiros de equipo que tamén ían disputar a proba, algúns na modalidade de 5 Km e outros na de 15 Km.

Tras cambiarme e realizar o quecemento, somos chamados a liña de saída onde nos explican un pouco como será o percorrido. Colócome adiante para intentar saír e quedarme no grupo de cabeza para intentar seguir a Abel Barros un dos corredores que a priori sería dos máis fortes.


Deuse o inicio a proba e arranco ben (cousa rara), gañando postos e quedándome como quería no grupo de cabeza, intentando seguirlles o ritmo. Tras os 2 primeiros km's quedámonos 3 na cabeza, sinceramente eu non sabía como correr nese momento xa que non estou a feito a liderar unha carreira polo que decido manter unha distancia e non adiantalos, así tamén ía reservando algo de forzas.


No Km 4,7 os da carreira de 5 ían cara meta mentres os de 15 tíñamos que dar outra volta e desta vez máis grande e dura. Nese punto comezo a quedarme atrasado respecto aos outros dous corredores aínda que, de momento conseguía velos e intentaba chegar de novo a eles.

Sobre o Km 8, comezamos unha subida que se me ía facer eterna, non tiña moita pendente pero estivemos subindo durante 1,5 km continuamente ata onde estaba o avituallamento intermedio do cal non me paro como é habitual.


Unha vez pasado o avituallamento comezamos a parte máis entretida xa que ata agora foi todo o tempo dar zapatilla. Na baixada había un tramo máis técnico onde xa tiñas que controlar onde pisar para non sufrir ningunha lesión, baixando cruzámonos cun coche que ía subindo e non me gustou moito, ben podía esperar un pouco a que pasaramos nos e despois darlle paso.

Rematada a baixada, tocaba volver subir pero xa por onde pasamos anteriormente xa dirección meta, eu ía mirando seguido para atrás xa que por diante non vía a ninguén e tiña que manter a posición como fora polo que nese último tramo de subida din todo o que me quedaba sabendo que o que viña despois era baixada e podía deixarme levar ata meta.


Chegado o punto onde na primeira volta os da carreira de 5 Km foron cara meta, fago unha última mirada cara atrás para comprobar que todo seguía igual e que non viñese ninguén e así afrontar os últimos metros máis tranquilo e sabendo que chegaba 3º da xeral.


O resultado final foi:
  • Posición xeral: 3º de 25. 🏆
  • Posición categoría: 1º 🏆
  • Tempo: 57:27 min.
  • Ritmo: 3:50 min/km

Os obxectivos cumpridos, conseguín chegar ao podio ademais sendo 3º da xeral e desfrutei moito da carreira xa que era por pistas e monte pero das de correr sen ter zonas moi técnicas propias de un trail. Para o ano espero repetir nesta proba e que se anote máis xente que aparte de ser para un boa causa, a organización e o trato ao corredor foi perfecta e dicir que tamén se podía adoptar a un cadeliño pero que no meu caso xa teño tres e non creo que poida levar máis aínda que se por min fora seguro que me levaba un. 
Para rematar felicitar tamén a Albino, compañeiro de equipo que foi 3º da categoría.


🏆 Clasificación xeral homes 🏆
  1. Roberto Riobo Estévez ............... 55:20
  2. Abel Barros González ................. 56:07
  3. Miguel Iglesias Amores .............. 57:27
🏆 Clasificación xeral mulleres 🏆
  1. Mara Garrido Míguez .................. 1:17:41
  2. Rebeca Muñoz Narciso ................ 1:19:46
  3. Laura Alonso Riosalido ............... 1:40:28
PD: Clasificación completa. Fotos cortesía da Asociación de Rescate Animal Cadeliños. Moitas gracias.
Tocou desprazarse a Ribeira para disputar a XX Carreira Popular Santa Uxía - Gran Premio Revolutrion sobre unha distancia de 10 Km homologados en dúas voltas e que este ano cambiaba de percorrido, anunciando que sería máis rápido e llano. Esta proba tamén está dentro do Circuíto de carreiras Arousa Norte, sendo esta a segunda, a primeira foi a Popular da Pobra no que sen confirmación oficial, vou 7º da xeral.

Os obxectivos serían:
  • Mellorar a miña marca nos 10K que é de 36:52 min. conseguidos este ano na Interrunning Porriño.
  • Quedar na mellor posición posible de cara a clasificación do circuíto.
Unha vez que cheguei a Ribeira, como xa tiña o dorsal do circuíto, tiven tempo de ir dar unha volta polo pobo e ver a carreira das categorías inferiores, mentres chegaba a hora de cambiarse. Unha vez cambiado, un pequeno quecemento e para a liña de saída onde me coloco na zona dianteira para non ter que recuperar moito despois e deuse o inicio (houbo xente que non puido saír a hora porque non sabía ou se despistaron de que a saída era nunha calle anexa a onde estaba o arco de meta).


Tras arrancar medianamente ben, sen perder moitas posición, comezo a marcar un ritmo forte dende o comezo onde pouco a pouco vou gañando postos.


Sigo tirando moi forte, pois na cabeza só pensaba en mellorar o tempo e cada vez que miraba o reloxo vía como o ritmo estaba aí que o podía conseguir.


Despois da primeira das voltas, no punto de control (5,2 km) marco un tempo de 18:34 min que equivale un ritmo de 3:34 min/km, que está moi ben xaque estaba rodando máis rápido que cando fixen a marca nos 5Km, agora tocaba aguantar como fora ese ritmo para conseguir o obxectivo.


Pero esta segunda volta fíxoseme eterna, comecei a notar as pernas como pedras e non querían traballar como antes, o cansancio era evidente e fun tirando como puiden intentando pensar noutras cousas para que estes últimos km's pasasen máis rápido. 


Os últimos 2 Km, vou mirando seguido para o reloxo para ir comprobando o tempo e aínda non me cría que fora bater a marca pero chegado o último km empezo a ver que si é posible é que ademais tiña cerca chegar por debaixo dos 36 min. o problema era o cansancio aínda que intentei dar todo o que me quedaba para conseguir a marca pero finalmente non puido ser aínda que conseguín mellorar a marca coa que chegaba.


O resultado final foi:
  • Posición xeral: 17º de 228.
  • Posición categoría: 5º
  • Tempo: 36:09 min.
  • Ritmo: 3:37 min/km.

Os obxectivos cumpridos e con creces, non contaba con mellorar tanto a miña marca xa que mellorei 43 seg. e con moi boas sensacións durante toda a proba, se cadra cara o final si é certo que me comezaron a fallar as forzas e estaba desexando chegar a meta pero creo que é algo normal. En canto a posición para o circuíto segundo as miñas contas gaño un posto polo que xa vou 6º e estou a 2 postos/puntos do seguinte clasificado, polo que moi ben. 

🏆 Clasificación xeral homes 🏆
  1. Nuno F. Ribeiro Pinto Da Costa .......... 30:56
  2. Pablo M. García Paz ............................ 31:03
  3. Juan A. Gude Vila ............................... 32:13
🏆 Clasificación xeral mulleres 🏆
  1. Paula Mayobre González ..................... 36:07
  2. Esther Rodríguez Díez ......................... 36:39
  3. Raquel Suárez Pedrosa ......................... 38:24 
PD: Clasificación completa. Fotos cortesía de: RunPhotos Galicia, Concello de Ribeira e Koala36 Retratografía. Moitas gracias.
Ultimamente non salgo do monte e é que lle estou collendo o gusto a isto de facer de cabra e a parte correr. Por iso despraceime ata Boiro onde se ía celebrar o IV Trail Castelo de Vitres, organizado por Tribu Trail e sobre unha distancia de 20 Km con un desnivel positivo de 1100 m.

Os obxectivos serían:
  • Chegar enteiro a meta. Todos me dixeron que este é un trail duro e moi técnico.
  • Desfrutar o que poida, dentro da dureza que espero.
Unha vez cheguei a Boiro, fun recoller o dorsal e xa me puxen a cambiar que eran horas. Desta vez nin quentei, tiña pensado saír tranquilo e xa ía quecendo polo camiño. Antes de saír volvéronme dicir que a proba era dura, sobre todo nas baixadas. Cando se ía dar a saída e antes da charla técnica, fíxose un sorteo con varios premios, coa sorte de que fun un dos agraciados con unha cea para dúas persoas en A Terraza de Chicolino, a ver con quen vou... 

Colócome na zona traseira co compañeiro de equipo que tamén disputaba a proba (Oscar) e arrancamos. A proba comezaba con 1,5 Km's de asfalto que me serviron para quecer.

Foto: Trail Castelo de Vitres
Cando comezamos a coller as pistas o primeiro que nos atopamos e o paso dun rio por encima dunhas pedras estratexicamente colocadas para poder pasar. Logo tiñamos 1 km no que era fácil correr para chegar de novo ao asfalto pero só uns metros, xa que era para meternos no camiño do monte que ía pegado ao rio, camiño que fago tranquilo porque non había maneira de adiantar pero mellor así, fun reservando forzas. Todo ese camiño pegado ao rio foi picando cara arriba.

Chagamos ao avituallamento do km 4 do cal paso, co tempo frío que estaba a facer non me apetecía nada e seguimos subindo ata o km 5,5 onde comezamos a baixar. Ata aí fun gañando postos pero foi chegar a baixada e comezar a pasarme por todos lados, as advertencias tomeinas ao pé da letra e fun tranquilo.

Foto: Lisardo Vilar Fotografía
A segunda metade da baixada foi bastante técnica xa que era moi fácil esvarar, por sorte non me pasou nada e continuei para volver a subir uns 600 metros onde continúo a perder postos.

Foto: Berial Fernández
Rematada esta cima fixen unha pequena baixada fácil para volver a subir novamente onde había un voluntario cunha bicicleta que nos dixo: "apurade que vai chover". Dito e feito, uns minutos despois comeza a orballar, nese momento cambio de chip e en vez de tomar a carreira con máis precaución foi o momento no que empecei a coller confianza e a sentirme ben, collendo bo ritmo e gañando posicións.

Na subida do km 8, unha das máis duras pola inclinación tiñamos frases nas pedras para animarnos a seguir como: "ánimo", "vamos" e ata un "siiiiii" de CR7.

Acabada a subida chegamos a zona máis alta da carreira, agora xa era todo terreo favorable. Pasamos polo Km 9 onde estaba o segundo avituallamento do cal tamén paso, agora se quería beber só tiña que abrir a boca e hidratarme ca auga da chuvia. Alá arriba atópome cun compañeiro do Barbantia Roda (Santi), onde comparamos como imos.

Chegamos a unha zona de baixada bastante técnica xa que había que correr por encima das pedras e estaban molladas, co cal esvarar era máis que probable, por sorte non pasou nada e iso que estaba indo rápido. Iso si, estaba intentando evitar as pedras todo o posible, o problema diso foi que o evitar as pedras ía contra os toxos e tiña as pernas todas rascadas.

Pouco a pouco seguía gañando postos e escapando dos perseguidores ata que comezamos a baixar por un camiño de pedras polo km 12, como se por alí antigamente pasase unha calzada romana ou algo así. Comecei a ir tranquilo e escoito como se comezaban a acercar por detrás. Danme caza cando chegamos a unha das zonas máis técnicas que atopei pegados a un riachuelo onde o musgo, raíces, pedras soltas e a sensación de que tiña que ir rápido para que non me adiantasen os que viñan detrás fixo sacar a miña pericia para salvar ese treito. 

Última subida, volvo deixar os perseguidores atrás e a acercarme a un corredor do CDM Vértice que me intenta fichar para a sección de trail da próxima tempada aínda que estou moi contento de pertencer ao C.D. Pinarium e de momento non teño intención de facer cambios.
Comezamos de nova a baixar por onde antes subimos polo que agora o terreo xa era coñecido.

Foto: Lisardo Vilar Fotografía
Chegamos ao último avituallamento no km 14 que antes era o primeiro do que volvo a pasar. Agora como xa sabía o percorrido comezo a marcar un ritmo forte, intentando ir como se fóra por asfalto algo que me gustou xa que tiña que estar máis en alerta para salvar obstáculos.

Xa de novo no asfalto ao lonxe vexo un corredor e decidín intentar collelo, pouco a pouco funme acercando, cando a falta de un km para chegar a meta vín que tiña a dous corredores algo que me fixo ir máis rápido.

Foto: Berial Fernández
Na recta final pouco a pouco funme acercando a eles, adiantei ao primeiro na metade da recta e o outro cando me veu, intentou aumentar o ritmo para deixarme atrás, eu seguín ao meu ritmo e cando vin que era capaz de chegar a meta esprintando comecei a dar zapatilla, o outro corredor tamén intentou esprintar pero finalmente leveime a vitoria neste esprint. Xa facía tempo que non chegaba nun esprint así de forte.


O resultado final foi:
  • Posición xeral: 31º de 127.
  • Posición categoría: 25º.
  • Tempo: 2:19:40.
  • Ritmo: 6:59 min/km
Os obxectivos conseguidos, cheguei enteiro e desfrutei moito deste trail, creo que o primeiro que fago chovendo algo que me gustou e que o fai moito máis interesante xa que tes que estar en alerta seguido. Finalmente non me pareceu tan duro como dicían, é verdade que é bastante técnico nalgunha zona onde non sabes como baixar ou como subir e que tes que controlar moi ben onde pisas pero máis ou menos é o que esperas dun trail (pode ser que pouco a pouco me estea sentindo máis cómodo no monte). 

🏆 Clasificación xeral homes 🏆
  1. Fernando Arca Casal ............... 1:51:18
  2. Esteban Toucedo Santos .......... 1:54:01
  3. Martín Lestón Aguilleiro ......... 1:54:42
🏆 Clasificación xeral mulleres 🏆
  1. Rebeca Mariño Torrado ............ 2:22:17
  2. Aída García López .................... 2:26:18
  3. Alba Rey Penelas ...................... 2:29:17
Tocou volver por Lalín, xa facía tempo que non corría aí, concretamente un ano nesta mesma proba e que este ano foi a II Carreira Solidaria Abanca Festas de Lalín, sobre unha distancia de 6 Km e nun percorrido de dúas voltas.

Os obxectivos serían:
  • Mellorar o tempo do ano pasado (20:55 min) sempre que sexa o mesmo percorrido.
  • Desfrutar do ambiente festivo que se espera que haxa dado que son as festas.
Unha vez cheguei a Lalín, fun recoller o dorsal a zona da saída onde xa me fun atopando con moitos compañeiros de carreiras. Púxenme a quecer cun compañeiro de equipo (Carlos Pampín) que tamén ía disputar a proba mentres comentábamos xa as nosas próximas carreiras (canto vicio...). Quecendo comezoume a dar flato, nunca me dera antes da carreira polo que paro o quecemento antes de ser chamados para a saída a ver se recuperaba. 
Xa recuperado fomos chamados para a liña de saída onde saco unha foto con Renato, compañeiro de carreiras mentres comentabamos como ía ser a proba e a dureza do trail que tiña que facer o domingo.


Coloqueime en primeira fila, para saír a tope dende o principio pero houbo un desconcerto na saída, pensei que cando se dera a saída era para dar o inicio da proba das handbikes pero resultou que saiamos todos a vez e houbo que tomar precaución na saída polo que perdín varios postos.


Unha vez que conseguín pasar as handbikes comecei a marcar un ritmo forte, intentando recuperar o terreo perdido e a gañar postos. Ao chegar a estación de buses de Lalín fixemos un xiro que non se facía o ano pasado polo que o obxectivo de tempo a mellorar xa quedaba descartado. Tras a primeira volta marco un tempo de 10:47 min que supoñía un ritmo de 3:36 min/km e pasando no posto 8º polo que bastante ben, agora tocaba aguantar e intentar mellorar si se podía.


A segunda das voltas foi mala, non sei o motivo pero non me sentía nada cómodo correndo, coa sensación de que estaba indo moi rápido pero o reloxo non dicía o mesmo e comecei a marcar ritmos de 4 min/km.
A falta de 1,5 km para meta comezo a mirar cara atrás xa que non me vía con forzas para chegar ao corredor que levaba por diante e tras varias miradas e ver que tiña unha boa vantaxe sobre o meu perseguidor, decido ir máis tranquilo e rematar xa pensando en recuperar para o trail de domingo. Esta última volta fíxena en 11:38 min que equivale un ritmo de 3:53 min/km e onde perdín dous posto respecto ao anterior paso por meta.


O resultado final foi:
  • Posición xeral: 10º de 171.
  • Posición categoría: 10º.
  • Tempo: 22:25 min.
  • Ritmo: 3:45 min/km.
Os obxectivos ben, ao non ser o mesmo percorrido xa non tiña referencia de tempo pero non acabei de estar cómodo na carreira, non sei o motivo pero sentinme raro correndo e as sensacións non foron moi boas xa dende o quecemento, ademais esperábame un pouco máis de xente animando por Lalín pero bueno dentro do que cabe un top 10 que non está nada mal para as sensacións que tiven.

🏆 Clasificación xeral homes 🏆
  1. Ricardo Vazquez Vaamonde .............. 20:10
  2. José Canda Louzao ............................. 20:21
  3. Maikel Rodríguez Domínguez ........... 20:57
🏆 Clasificación xeral mulleres 🏆
  1. Verónica Mon Seijas ........................... 27:26
  2. Andrea Elizabeth Saavedra Novoa ..... 27:56
  3. Lucía Mariño Paz ................................ 28:14
PD: Clasificación completa. Fotos cortesía do Concello de Lalín. Moitas gracias.