Cheguei a Ourense unha hora antes do comezo da proba para intentar aparcar preto da saída pero todos deberon pensar o mesmo e non conseguín aparcar onde quería. Cando conseguín aparcar fun cara a zona da saída coa sorpresa de que a gran maioría dos corredores xa estaban quentando. Cando xa faltaba media hora para o comezo, decido poñerme a quecer e a falta de quince minutos xa vou cara a saída para colocarme nun bo sitio.

Coloqueime adiante de todo no caixón que me correspondía, aínda que alí había dorsais de todas as cores e só controlaban que ninguén se colase na zona elite. Unha vez se abre o caixón e avanzamos cara adiante para comezar a proba quedo situado practicamente adiante de todo, creo que nunca saíra tan adiante nesta proba. Coa hora exacta, arranca a proba.

Arranquei bastante ben, aínda que ao ter que coller sitio, cando saín xa estaba frío e custoume entrar en carreira ata entorno ao Km 1,5, ao cruzar pola ponte romana. A partir de aí comecei a recuperar moitos postos e a correr ao ritmo obxectivo para mellorar a marca. Practicamente fun tirando forte durante todo o tempo, incluso me sentía forte nas subidas.

No paso polo control do km 5 pasei nun tempo de 18:02 min. que supoñía ir a un ritmo de 3:36 min/km. Bastante ben xa que só fixen 14 seg. máis que a miña marca nos 5K e este ritmo valíame para conseguir o obxectivo.

Sigo tirando forte pero comezo a notar a falta de forza e a levar unha respiración máis axitada do normal algo que puido ser provocado por exceso de mucosidade na garganta. 

Cada pouco tempo miraba o reloxo, vía que estaba indo moi rápido e que tiña moitas opcións de conseguir o obxectivo polo que, sigo tirando a tope sabendo que o último km sempre se me fai moi longo.

Ese último km comeza cunha subida importante, non sei si será a que máis pendente ten en toda a proba pero ao estar ao final faise eterna. Subín intentando perder o menos tempo posible pero sen dar todo o que me quedaba xa que tras esta subida viña unha baixada ata a ponte romana e alí a ponte volvía picar cara arriba. Nese punto foi onde din todo o que me quedaba porque si me relaxaba aí era posible de que non chegase ao obxectivo. A partir de aí xa por inercia e polos moitos ánimos do publico chegas a meta moi rápido e aínda que puiden sprintar para recortar algún segundo ao crono non o fixen porque cando vin o marcador do tempo quedei moi satisfeito co resultado.

O resultado final foi:

🏆 Clasificación xeral homes 🏆