PREVIA

Primeira proba deste 2019 e primeira polo monte. Tocou desprazarse ata Ribeira onde se celebraba o Trail da Cidá. Unha proba organizada por Arousa Neo duns 14 Km con un desnivel acumulado entorno aos 600m. Non cheguei moi preparado xa que levaba parado dende a San Silvestre por mor dunha forte gripe e comecei a adestrar na mesma semana. 

Os obxectivos serían:

A PROBA

Cheguei a Ribeira cos compañeiros de equipo, fomos recoller o dorsal e a acabar de cambiarnos. Sen apenas quecer xa tocou poñerse na saída mentres saudaba a outros compañeiros de carreira que ían disputar a proba pero antes o fotógrafo e speaker (neste caso non lle tocou) Eduardo sacoume unha foto xa que eu non podía quedar sen ela... jajaja

Foto: Arousa Neo

Tras unha conta atrás deu comezo a proba. Non arranquei nada ben, posiblemente por non quecer xa que me estaba custando bastante coller ritmo e estaba indo incómodo. A parte saín algo máis atrasado e non había moito sitio por onde gañar postos nos primeiros metros da proba.

A proba arrancaba dende a Praza do Concello e ía subindo polo Parque Periurbano de San Roque (Km 1,3). Uns 700 metros despois do parque rematamos coa primeira das 3 subidas importantes que tiña a proba.

Foto: Arousa Neo

Tras rematar a primeira subida (km 2), tocaba baixar e foi cando comecei a atoparme máis cómodo e a marcar o meu ritmo. Isto provocou que pouco a pouco fora dando caza a corredores e gañando postos.

Foto: Arousa Neo

A baixada non era moi forte xa que íamos baixando e de repente algunha pequena subida pero de momento levábase ben sen ser moi técnico máis que controlar onde se pisaba. Así fun ata rematar a baixada (km 4,5) xa que agora tocaba facer a segunda subida e posiblemente a máis dura. Tiñamos que subir ata o Mirador da rá (o seu nome débese a que hai unhas pedras con forma de rá). A subida foi a típica que se sube andando (ou eu polo menos, non sei os de cabeza...) incluso para rematar a subida por unha pedras había unha corda para axudarnos a subir e non era pola inclinación senón porque as pedras estaban esvaradías. Grandes vistas se podían contemplar dende ese punto pero non me puiden deter moito xa que quería seguir recuperando postos.

Foto: Arousa Neo

Rematada a subida (km 5,4) e antes de comezar a baixada tivemos que sortear un obstáculo o cal era a primeira vez que me atopaba con algo así. Primeiro tivemos que entrar no oco que había no medio dunhas grandes pedras amontoadas, parecía unha cova ou un "dolmen" o gracioso é que alí dentro había unha persoa da organización posiblemente o mais listo de todos xa que esta resgardado do aire que alí arriba facía. Despois tivemos que atravesar polo medio de outras dúas grandes pedras que deixaban unha fenda por onde pasar e a verdade non sei se pasou todo o mundo por aí xa que o espazo entre as pedras era moi xusto e incluso eu me rasquei para atravesar.

Unha vez sorteados eses dous obstáculos comezou a baixada en dous tramos. Primeiro uns 300 metros, logo subir uns 200 metros e acabar de baixar xa ata o km 7.

Dende o Km 7 ata o 10 foi un continuo sube e baixa non moi duro pero si moi entretido xa que se non recordo mal foi cando nos tocou percorrer camiños anegados e cheos de barro. Entorno ao km 9 estaba o único avituallamento liquido que había na proba, do cal pasei xa que eu levaba o meu propio.

Foto: Arousa Neo

Rematado o tramo anterior tocaba volver a subir xa por última vez. Esta subida levaríanos ata o Castro da Cidade, un tramo duns 1,5 km e que ía subindo aos poucos, un pouco andando e outro pouco correndo. A verdade que cando chegamos a cima non me fixei se había Castro ou non, xa que estabamos no km 11,5 e tocaba afrontar a última baixada xa dirección a meta.

Foto: Arousa Neo

Foi unha baixada moi rápida onde conseguín seguir gañando postos a pesar de que o meu forte non é baixar (parece que agora si). A baixada era o mesmo tramo que fixemos subindo ao comezo da proba polo Parque Periurbano de San Roque, onde teñen unha recreación dun castro (seguinte foto), polo que máis ou menos sabía o que nos íamos atopar.

Foto: Arousa Neo

Houbo un tramo que non me gustou nada baixando, unha zona empedrada que castigaba moito as pernas con un xiro cerrado ao final, a partir de aí xa por asfalto encarabamos os últimos 300m. onde escoitaba de fondo como o corredor que me perseguía estaba cada vez máis preto, polo que comecei a aumentar o ritmo acercándome a ritmos de 3:00 min/km xa que non quería perder ningún posto para a clasificación por equipos.

RESULTADOS

• Posto xeral: 48º de 344.
• Posto categoría: 17º.
• Posto equipos: 10º de 19.
• Tempo: 1:18:23.
• Ritmo: 5:25 min/km.

OBXECTIVOS

🏆 Clasificación xeral homes 🏆

1. Victor González Horta ...... 1:08:08
2. Carlos Lorenzo Blanco ...... 1:08:11
3. Esteban Toucedo Santos ... 1:08:17

1. Beatriz Barroso Pérez ............ 1:26:24
2. Elena Matalobos Redondo ... 1:28:15
3. Pati Martínez Lago .................. 1:33:00