Nada máis cheguei fun recoller o dorsal e como aínda quedaba tempo para o comezo da proba fun dar unha volta por Pontevedra e así ir estirando as pernas un pouco. Chegado o momento cambieime e púxenme a quecer un pouco, só 5 minutos porque era a hora de sacar a foto co equipo e non a quería perder.

Tras a foto, un par de conversacións con algúns compañeiros e para liña de saída xa que quería estar ben colocado para non ter que facer máis esforzo a hora de recuperar postos. Tras a esperar no caixón de saída onde o pouco que quentara xa non se notaba, deuse a saída con un pequeno susto. Practicamente diante miña houbo unha caída na que por sorte o corredor se puido levantar rápido e que non me levasen a min por diante. Foi un momento tenso pero sen maiores consecuencias.

Pasado ese momento comecei a correr a un ritmo "tranquilo" onde vou recuperando postos pouco a pouco e intentando manter o ritmo por debaixo de 4:00 min/km. Consigo facelo, aínda que me estaba custando por quentar pouco polo que, eses primeiros km's os tomei en modo quecemento para afrontar o resto da proba. Así os dous primeiros km's saíronme a un ritmo de 3:54 e 3:53 min/km os máis lentos que fixen en toda a carreira. Nestes primeiros km's fun acompañado por José, responsable da sección de atletismo do CD Pinarium que me indicou a quen tiña que seguir para intentar facer marca.

A partir do km 2,5 aprox. comecei a incrementar o ritmo para empezar a facer os km's por debaixo de 3:50 min/km xa que era o ritmo obxectivo para mellorar o tempo. Con este ritmo gañei moitos postos e estaba bastante cómodo mirando cada pouco o reloxo para controlar como ía. 

Polo Casco de Pontevedra fun con un grupo que levaba moi bo ritmo (km's dende o 3,3 ata o 6).

Saíndo do casco e volvendo a estrada, empecei a marcar o meu ritmo, sentíame moi cómodo pero non sei se o reloxo estaba ben porque me marcaba que ía a un ritmo de 3:20 min/km e tiven que afrouxar un pouco porque senón seguramente a segunda metade da proba ía rebentar. O grupo no que estaba pouco a pouco o fun deixando atrás e só me seguía un corredor. Creo que das poucas veces que alguén me intenta seguir o ritmo e era unha sensación rara, estaba facendo a función de lebre.

A proba seguía cara unha das zonas que menos me gusta, a estrada que vai cara Monteporreiro, xa que son longas rectas e sen animación onde tes que tirar máis de cabeza para non virte abaixo e seguir co ritmo que levabas antes axudado polos ánimos da xente. Tras facer o segundo cambio de sentido no km 8,8, alcánzanme un par de corredores que me poño a seguir para ir ao seu ritmo xa que era máis forte que o meu, xa ían sendo horas de comezar a aumentar o ritmo. Así chegamos ao terceiro punto de control no km 10 o cal paso nun tempo de 38:08 min.

Continuaba nese pequeno grupo que se formou ata o km 13,6 aprox. na entrada de novo ao casco de Pontevedra, onde tras falar do rápido que estabamos indo nos últimos km's, algúns afrouxaron un pouco e outros, nos que me inclúo, seguimos intentado ir ao mesmo ritmo xa que as sensacións seguían sendo moi boas e de seguir así o obxectivo estaba cumprido.

Saín do casco outra vez e o reloxo volve a marcar 3:20 min/km, penso que é pola inercia da saída xa que é terreo favorable. Seguía gañando postos, algo que xa non me parecía tan normal porque xa só faltaban entorno a 5 km. Estes últimos km's tiven sensacións contraditorias xa que antes de chegar a estrada que vai a Monteporreiro tiven un baixón leve, a cabeza comezábame a dicir que ata aquí cheguei e as pernas xa as notaba cansas e doloridas, incluso xa me estaba custando seguir a xente que tiña por diante. Todo cambiou no km 18,6 foi como si o corpo fixera un reset e volvera a estar a tope. Comecei a tirar forte, xa ninguén me daba seguido e pouco a pouco os fun deixando atrás. Agora xa non podía afrouxar e seguín tirando con todo o que me quedaba ata gañei algún posto. Xa non miraba o reloxo só estaba concentrado en manter ese ritmo alto para chegar a meta.

Xusto antes de entrar nas pistas de atletismo do Centro Galego de Tecnificación Deportiva onde tiñamos que dar case unha volta, perdo un posto. As pernas xa non podían máis e o compañeiro que me adiante díxome que fora con el, polo que fixen un último esforzo para seguilo e non perder tempo. Cheguei a meta moi contento ao ver o crono e quitándome un gran peso de encima.

1. Paula Mayobre González ....... 1:16:52
2. María J. Gestido Rodríguez ... 1:21:29
3. Beatriz Fernández Gil .............. 1:27:01