Tocou participar nunha proba que levaba moito tempo sen facer xa que dende o 2018 non volvía por estes lares. Despraceime ata O Carballiño para participar na XIII Carreira Solidaria do Arenteiro proba organizada polo equipo no que actualmente estou é que ten unha distancia de 10Km tirando a duros. Coma todos os anos a hora de recoller o dorsal había que entregar un mínimo de 1Kg de alimentos non perecedoiros para Cáritas e este ano como novidade tamén había proba de 5Km.

O obxectivo sería:

Arranquei ben, e tras o xiro que estaba a poucos metros xa comezo a recuperar postos. A primeira parte da proba era bastante favorable o que fixo que fose a moi bo ritmo durante ese tempo, de feito o primeiro km e o terceiro saíronme a 3:29 min/km e 3:25 min/km respectivamente. Sobre o Km 2,6 collemos un desvío que xa nos levaría cara o paseo polo rio Arenteiro.

O paseo estaba perigoso xa que chovera os días previos e estaba un pouco enlamado o que facía que en cada pisada puidésemos esvarar pero con bastante precaución e cambiando un pouco o ritmo foise levando ben. Xusto antes de chegar ao Km 4 estaba a chicane en subida, como me gusta esa parte.

Pasado ese punto íamos camiño da pasarela de madeira que este ano tamén estaba moi esvaradía tanto que tras pasar eu un dos corredores que viña por detrás caeu.

Xusto antes de chegar a ponte para cruzar o rio Arenteiro esta o punto km 5 no que paso nun tempo de 18:26 min. que supoñía un ritmo de 3:41 min/km. Subimos a ponte con precaución porque tamén estaba bastante esvaradía e tras facer uns xiros por alí, pasamos por debaixo da ponte.

Cando saímos do paseo e volvemos ao asfalto polo Km 5,8 estábanos esperando o avituallamento con auga no cal non me deteño. As sensación seguían sendo bastante boas xa non era o ritmo do principio pero mantiña posición xa que por adiante estaban lonxe. Dende o avituallamento o terreo era completamente chan pero na miña cabeza xa estaba a subida que nos esperaba.

Chegamos ao Km 7 e comezou a subida que estaba esperando posiblemente a máis dura da proba. Subida duns 300m e con bastante inclinación na que forcei de máis porque ía "pelexando" por posición. Subín bastante ben pero quedei coas pernas desfeitas por sorte tras chegar arriba viña unha baixada para intentar recuperar o alento e as pernas.

Foto: Docasar Fotografía

Agora estabamos nun sube e baixa polo Parque Municipal que remataba con outra subida interminable onde perdín outro posto pero eu xa non podía máis, subida de case 700m con menor inclinación que a anterior e que nos deixaba no Km 9.

O último km xa fun por inercia e mirando cara atrás por toda a subida a meta para non perder máis postos que finalmente consigo e chegar satisfeito co rendemento obtido.

Foto: ZeusOurense

O resultado final foi:

En canto a carreira bastante ben, voluntarios nos cruces perigosos, avituallamento intermedio con auga, avituallamento final moi completo con auga, isotónico, froita, biscoito e chocolate quente. Duchas moi lonxe pero tiñan micro bus para acercarnos e volvernos a traer ata a zona de meta e agasallo dunha camiseta técnica que a min non me gustou porque é negra.

*Problema co chip: Carreira cronometrada con Championchip Norte, a quen lle comprei o chip amarelo na carreira de Vilagarcía (30/07/2022) para non ter que estar pagando 1€ de aluguer cada vez que faga unha proba nas que estea esta empresa. O día da proba de Vilagarcía non me deron ese chip porque dixeron que tiveran un problema co transporte e que se me ía entregar na próxima carreira. Uns días antes mandeilles un correo para que soubesen que ía ir a esta proba onde facía falta o chip e que non o tiña coa resposta de que se me ía entregar na próxima proba. Cando recollín o dorsal, sorpresa, por alí non había chip ningún, tiven que ir onde os responsable comentarlle a situación e tiven que pagar polo aluguer doutro chip para poder correr... Esperarei a seguinte proba a ver se mo dan, aínda que tamén o podían mandar por correo que cando non entregas o chip en aluguer é o que temos que facer ben podían facer o mesmo xa que foi o seu problema non entregarmo senón a ver que fago porque será por carreiras...

🏆 Clasificación xeral homes 🏆