Tocou regresar a Porto do Son onde se celebraba a IX Sin Son 10K. Unha carreira en liña con saída en Portosín e meta en Porto do Son. Este ano como invitado repetía Adrián Ben, atleta que este ano participou nas olimpíadas.

O obxectivo sería:

Xa en Portosín fun tomar un té/café cuns compañeiros e "veciños" ata que chegase a hora de cambiarse xa que o día estaba frío e nada máis sacar a roupa había que poñerse a quecer. Así foi, chegada a hora cambieime e levei a bolsa ao gardarroupas para inmediatamente poñerme a quecer. Xa non facía tanto frío como o principio e unha vez estabas correndo xa non se notaba.

A falta de 5 min para o comezo da proba, funme achegando a liña de saída para quedar ben posicionado, faltaban corredores que estaban a quecer pola outro lado da liña de saída e que se ían colocar por adiante polo que nun principio estaba dos primeiros pero logo xa fun quedando máis atrasado.

Xa todos colocados, comunican por megafonía o método de saída por caixóns. Íamos saír por intervalos de tempo entre caixóns. Eu estaba no primeiro polo que xa me tocaba saír e tras unha conta atrás deu comezo a proba.

Foto: Marcos Creo (La Voz de Galicia)

Saín bastante mal e con moita precaución para non tropezar con outro corredor. Uns metros máis adiante vin a corredor polo chan polo que a miña precaución era xustificada. Foi unha saída moi rápida xa que nos primeiros metros íamos a menos de 3:20 min/km pero non quería correr mirando o reloxo e intentar apertar todo o que podía a ver como saía. Así os tres primeiros km's onde damos unha volta a toda a zona do porto de Portosín, marco un tempo de 10:23 min que supoñía un ritmo de 3:28 min/km. Todo ía perfecto para lograr o obxectivo.

Tras o Km 3 imos ao carón da Praia de Coira xa rumbo a estrada xeral para coller dirección a Porto do Son. O ritmo xa comezaba a ser máis normal para min, ademais xa comezaba o sube e baixa característico desta proba. Intentaba apertar un pouco máis porque diante miña ía un grupo de corredores onde tamén ían as dúas primeiras corredoras. Non fun capaz de chegar e a partir do punto de control do Km 5 funme quedando pouco a pouco. Por ese punto marquei un tempo de 17:57 min. que supoñía un ritmo de 3:35 min/km xa estaba no límite do obxectivo e as sensación comezaron a empeorar.

Empecei a sentir molestias nun xeonllo, a mesma sensación que tiven ca Carreira de Boiro, pero desta vez era unha molestia máis notable sen chegar a doer, intentei seguir co mesmo ritmo probándome a ver se cambiaba algo no xeonllo pero nada. Cando chegamos ao Km 7 onde empeza a subida máis dura desta proba decido cambiar de ritmo e deixarme levar ata a meta. Xa ía facendo trazadas abertas para non molestar aos corredores que me estaban adiantando. Así pasei os últimos km's vendo como ía perdendo posicións ata chegar a meta, algún corredor animabame a seguilo pero por precaución seguín co meu ritmo máis tranquilo.

O resultado final foi:

En canto a proba, moi boa organización coma sempre o único que me quedei sen camiseta e bolsa da proba porque cando recollín o dorsal en Decathlon Santiago non me deron nada e resulta que a tiñan que dar alí pero bueno, como teño unha chea delas tampouco me preocupa moito. Para o ano máis e espero que mellor.

🏆 Clasificación xeral homes 🏆