Cheguei a Santiago moi cedo xa que este ano non puiden ir recoller o dorsal os días previos e teño que collelo o mesmo día na Praza do Obradoiro. Para facer tempo fun dar unha volta por Santiago. Chegado o momento, acabei de cambiarme mentres vin a carreira doutra categoría e púxenme a quecer con compañeiros das carreiras que tamén ían disputar a proba. 

A falta de 10 minutos para a saída, funme achegando a zona da saída xa que nesta proba ou saes adiante ou o tes complicado para recuperar postos e facer un bo tempo. Coloqueime nunha quinta fila aprox., máis ou menos cos corredores que teñen un ritmo parecido ao meu polo que estaba ben situado e tras o pistoletazo comeza a proba.

Os primeiros metros foron de supervivencia, moitos cóbados e corredores buscando sitio por onde non o había, por sorte creo que non pasou nada. Pasados os dous primeiros xiros xa se podía comezar a correr e a haber máis espazos, polo que comecei a recuperar os postos que perdín na saída por ir con precaución. Así fun toda a primeira volta recuperando postos e intentando tirar forte buscando baixar dos 20 min. ao final da proba. Tiven un pequeno susto na Alameda cando Julio, compañeiro das carreiras, segundo me contou ao final tropezou e chocou contra min pero sen maiores consecuencias. A verdade é que pensei que a culpa fora miña que lle dera eu sen querer co cóbado.

Pasei por meta marcando un tempo de 9:54 min. que equivale un ritmo de 3:36 min/km. Só tiña que aguantar a ese ritmo e o obxectivo do tempo estaría cumprido polo que sigo tirando. 

Durante a segunda volta apenas gañei postos, foi máis unha pelexa comigo mesmo xa que o cansancio comeza a notarse e a miña cabeza quería ir máis rápido pero as pernas non ían máis, así fun toda a segunda volta. A falta de uns 500 metros para meta, no remate da subida, máis dura do percorrido, Julio adiántame, eu póñome a seguilo xa que a partir de aí era todo terreo favorable, na última baixada pásolle e encarando xa a recta de meta comecei un longo sprint que non remato ata cruzar a liña de meta porque miraba o crono e estaba a piques de non conseguir baixar dos 20 min.

Cheguei a meta facendo esta segunda volta en 10:03 min. peor que na primeira volta pero o cansancio e esa última subida acabaron comigo.

🏆 Clasificación xeral mulleres 🏆