Desta vez tocou desprazarse ata Rianxo onde se disputaba a III Carreira Popular Toffe – Concello de Rianxo e que transcorría por un circuíto de 3 voltas ata completar os 10 km. 

O obxectivo principal será mellorar o resultado do ano pasado xa que teño un tempo de 39:22, intentar non sufrir coma o ano pasado xa que a iso da segunda volta me empezou a dar flato (un punto) e o meu rendemento veuse abaixo para recuperarme desa molestia e a desfrutar o que se poida desta carreira. 

Unha vez chegados a Rianxo fun recoller o dorsal, vin un pouco as carreiras das categorías inferiores e púxenme a quentar. Desta vez coloqueime bastante adiante para poder empezar a mellorar nas saídas pero cando arrancou a carreira pasou o de sempre, con moita precaución e perdendo moitas posicións. Rápido atopei por onde comezar a correr a un ritmo alto e a recuperar posicións, a primeira volta dina nun tempo de 12:05 minutos con un ritmo alto pero que parecía que podía aguantar ben pero non foi así. Na metade da segunda volta empecei a virme abaixo en canto a rendemento aínda que intentei manter o ritmo cada vez ía a menos e para colmo comezaba a darme flato (igual que o ano pasado). 

Así o paso pola segunda volta marquei un tempo de 12:47 minutos e comezaba a derradeira volta sen forza nas pernas e incluso algo desmotivado vendo como non tiña moita forza para continuar e como me comezaban a adiantar outros corredores. Esta última volta fíxoseme eterna na que non conseguín adiantar a ninguén (quitando algún dobrado) e onde me pasou bastante xente incluso non loitei o sprint final perdendo outra posición. Esta última volta tardei en dala 13:32 minutos polo que se ve hai moita diferencia da primeira a última volta e que saco a conclusión de que me falta adestramento ou que a primeira volta a din moi rápido. 

O final posto 59º de 433 e 15º da categoría con un tempo de 38:27 o que equivale un ritmo de 3:50 min/km. Os obxectivos finalmente cumpridos xa que baixei 55 segundos a marca do ano pasado. Esperaba mellorar moito máis e non ter molestias coma o ano pasado pero que ao final non foi así polo que acabei bastante desmotivado tras as malas sensacións que tiven durante a carreira. 

Resumindo carreira ben organizada que se pode dividir en dous a zona urbana onde hai bastante público animando e a parte do porto que a min persoalmente non me gusta moito sen público.

Gracias a DRUIDA1313, SUSO e FOTOSDERIANXO pola reportaxe fotográfica.