Desta vez tocou desprazarse ata Negreira, onde se disputaba a XXXVI Carreira Popular Concello de Negreira e que transcorría por un circuíto de 2 voltas ata completar os 10 km. O obxectivo principal será desfrutar, xa que é a primeira vez que participo e ando tocado dun pe con dor cando teño que facer xiros cara esquerda. 

Unha vez chegados a Negreira fun recoller o dorsal e xa me puxen a quecer porque cheguei xusto de tempo e para probar como me ía o pé. 

Tras colocarme no meu caixón, deuse a saída. Como a intención era de desfrutar e comprobar como me respondía o pé, intentei ir tranquilo na primeira volta e así comprobar a esixencia do circuíto de Negreira que tiña fama de ser duro, aínda que este ano o circuíto era novo e a priori máis cómodo. Os primeiros metros non fun nada cómodo perdendo posicións e coa sensación de ter as pernas cansas, esa sensación dúranme ata pasar o km 1 onde empecei a sentirme máis cómodo e comezar a acercarme ao meus ritmos, menos nas curvas a esquerda e na rotonda que tiñamos que dar que tamén xirabamos nese sentido, onde perdía algo de tempo pola dor no pé. 

Tras completar a primeira volta marquei un tempo de 18:43, bastante ben para ir coa idea de non forzar. Na segunda volta intentei ir un pouco máis rápido para seguir probando o pé e as molestias eran iguais que antes, polo que intentei manter ese ritmo pero o continuo sube-baixa da carreira fixo que o meu rendemento baixase xa que viña sen preparar nada a carreira e aínda que intentei adiantar a un grupo que ía por diante, na recta de meta dinme por conforme co resultado e non loitei ningún posto, ademais por detrás non tiña a ninguén preto polo que entrei en meta bastante cómodo, practicamente andando. Esta última volta a pesar de querer ir máis rápido dina máis lento completándoa nun tempo de 19:11. 

O final posto 86º de 654 e 22º da categoría con un tempo de 37:54 o que equivale un ritmo de 3:46 min/km. Os obxectivos finalmente cumpridos xa que aínda que sigo tendo molestias nos xiros a esquerda o rendemento que tiven foi bastante bo e as sensación tamén, facendo mellor tempo que en Rianxo onde o circuíto era máis plano e a priori máis rápido.  

Resumindo carreira dura e ben organizada, onde hai un gran nivel de atletas e que hai que preparar ben si se quere facer algo. Para o ano intentarase estar para mellorar rexistros e sobretodo chegar máis preparado. 

Fotos cortesía de Runphotos Galicia, Jmdobarro e David Martinez.