Despois da carreira de onte en Muros hoxe tocou desprazarse ata Arca en O Pino onde se celebra a XII Carreira Popular Concello de O Pino sobre unha distancia de 8,1 km, esta será a miña carreira nº 50.

O obxectivo será o de mellorar o resultado do ano pasado, aínda que este ano o recorrido é o mesmo (2 voltas) faise ao revés e a ver como sae.

Tras estar chovendo toda a noite, parecía que ía tocar mollarse pero unha vez que chegamos a Arca parou de chover e ata saíu o sol. 

Tras realizar o quecemento, eu xa me sentía mal, sen boas sensación nas pernas polo desgaste de onte e o estómago, aínda co almorzo, tampouco estaba ben, se cadra polo nervios que me seguen producindo cada carreira.

Unha vez fomos chamados para colocarnos na saída, tivemos que esperar un pouco xa que a pistola coa que se ía efectuar a saída non funcionaba pola chuvia e despois de que arranxaran ese pequeno problema, deuse a saída. Comecei forte para intentar levar un ritmo constante e se ao final me quedaban forzas ir subindo o ritmo.
No primeiro km fun gañando posición e sentíame ben, as pernas parecían que estaban fortes e as molestias do estómago desapareceran. Cando chegamos a zona por onde pasa o Camiño Francés que transcorre por terra, estaba feito unha lameira polas chuvias da noite e ao ir aínda en grupo parece que pillei todos os charcos que había pero iso fixo máis entretida a carreira, aínda que nalgún estiven por caer ao esvarar.
Ao paso pola meta para dar a segunda volta as pernas empezáronse a virse abaixo e con elas o meu rendemento. Empecei a ver como os atletas cos que ía no grupo pouco a pouco se ía indo e os que viñan por detrás me comezaban a alcanzar. Foron sobre 3 km nos que as pernas non ían e nos que perdín posicións pero as pernas non daban máis e pode ser que me desmotivara ver como me collían os atletas que viñan por detrás e eu non daba feito nada. Aínda así o último km fixeno coas forzas que me quedaban para que non me collera ninguén máis pero a 200 metros para a meta pasaronme outros dous atletas e eu xa desistín, mirei cara atrás e como non viña nadie xa fun máis relaxado.

Ao final cheguei no posto 37º de 280 chegados a meta e 5º da categoría con un tempo de 31:08 que equivale a un ritmo de 3:50 min/km, desta vez non ai podio pero despois das malas sensacións que tiven durante gran parte da carreira, quedei máis que contento co resultado, ademais conseguín o obxectivo de mellorar o resultado do ano pasado pero non o tempo polo que parece que ao facer o circuíto ao revés se volve máis lento. Incluso aprendín o importante que é ir ven de cabeza para non desanimarse durante o transcurso da proba.

En resumen unha proba que para min creo que é máis dura facéndoa neste sentido que como o ano pasado pero que está moi ben organizada e todo ben marcado. Para o ano volverei, se as lesións respectan para intentar mellorar que tendo boas sensación debería conseguilo.