Cheguei cedo a Pontevedra para poder aparcar tranquilamente e case non atopo sitio porque onde aparcaba sempre este ano non se podía e tiven que buscar outro sitio. Fun recoller o dorsal e xa vin que o tempo non era o mellor para a carreira, estaba o chan mollado, facía aire e a probabilidade de que seguise chovendo era moi alta polo que o obxectivo xa non sabía se ía ser viable. Tras recoller o dorsal estiven dando voltas ata que chegou o momento de cambiarse e poñerse a quecer e de paso pasar por cámara de chamadas para confirmar asistencia no campionato. Chegado o momento funme acercado ao arco de saída, mentres non deixaba de orballar e así tras un disparo ao aire deu comezo a proba.

Foto: Organización

Arranquei ben, sabendo que ía ser unha carreira longa e xa dende os primeiros metros mirando o reloxo para intentar ir por debaixo do ritmo obxectivo que serían os 3:45min/km. Así pouco a pouco fun gañando postos e sobre o km 1 xa quedo nun grupo grande. Segundo van pasando os km's o grupo cada vez é máis pequeno ata case quedar 5/6 corredores. Entre eles tres membros do Atletismo Cambados que collín de referencia xa que segundo íamos avanzando na carreira o ritmo estaba sendo perfecto e a verdade que ía cómodo metido nese grupo.

O percorrido nestes primeiros km xa era diferente ao que fixera da última vez xa que agora hai que ir dar unha volta pola zona do Campus de Pontevedra e despois xa se volvía ao trazado de sempre ata a zona do centro de Pontevedra que agora vas ata a Praza da Peregrina e non se da toda a volta polo centro. Despois cando chegabas a altura das pistas de atletismo onde estaba a meta, os outros anos non se entraba dentro ata a ultima volta e seguías de fronte para dar un rodeo agora entras dentro das pistas en cada volta para saír pola porta lateral. O resto era todo igual agás que con estes cambios os cambios de sentido se facían antes. Algo positivo porque a min non me gusta nada a zona que vai cara Monte Porreiro e era onde máis estaba pegando o aire.

Pois así tras comprobar os cambios remataba a primeira volta onde seguía no grupo cos de Cambados e algún corredor máis, pasando polo Km 10 nun ritmo de 3:43 min/km. As sensacións estaban sendo perfectas algo co que non contaba nada máis chegar a Pontevedra e comprobar o tempo que facía.

Foto: Organización

A segunda volta foi máis do mesmo pero xa non ía tan cómodo agora xa notaba que tiña que forzar un pouco máis para manterme no grupo ata a altura do Km 17 onde tiven que empezar a tirar eu un pouco do grupo porque o ritmo estaba caendo de feito, igual no seguinte quilómetro e medio apertei de máis xa que me saíu o Km a 3:31.

Había que facer un último esforzo, o ritmo medio mantíñase nos 3:43 min/km polo que eu ía perfecto. As sensacións xa non eran tan boas sobre todo cando tocou regresar pola estrada de Monte Porreiro, o cansancio xa era notable e agora xa ía apertando ao máximo para que non se me escapara o tempo. A todo isto o aire tamén quere facer apto de presencia e nese tramo comezou a soprar máis. Entramos nas pistas de atletismo para darlle a volta xa dando o último que me quedaba para cruzar a meta coa sensación de dalo todo pero sorprendido co tempo porque non era o que me esperaba.

O obxectivo non se conseguiu. Resulta que xusto cando estaba chegando a meta vin o crono que estaba no arco e o tempo non correspondía co ritmo ao que estaba correndo e cando mirei o reloxo resulta que me saíron 300m de máis. Nese momento estaba bastante frustrado xa que polo reloxo corrín como quería pero non me saíu o tempo por algún motivo que descoñezo xa que pode ser que a distancia estivese mal medida, non collera ven a liña da proba para facer a distancia xusta ou ao estar o día anubrado tivera fallos de GPS. En definitiva que o esforzo realizado non tivo o seu premio pero sei que teño o ritmo para poder mellorar nesta distancia xa que ao ritmo que acabei ía para 1:18:30 e creo que incluso a ese tempo lle podo baixar algo ata facer un sub 1:18:00 a partir de aí xa teño que preparar moi ben a proba para seguir baixando.

🏆 Clasificación xeral mulleres 🏆