Cheguei cedo a Estrada e deume tempo de ver algunha das probas das categorías inferiores mentres vou recoller o dorsal. Chegado o momento, púxenme a quentar, xa que a idea era saír rápido dende o principio. Cando faltaban 15 min. para dar comezo a proba entrei dentro da recta de meta e como vin que aínda non había ninguén para a saída fun quentar un pouco máis. Cando volvo para colocarme na saída xa estaban todos os corredores colocados e a pesar de intentar avanzar quedeime no medio do pelotón, polo que frustrado comigo mesmo, ía tocar remontar moito, xa que a saída é estreita e ata pasar os 200/300 metros inicias ía ter moi complicado remontar.

Deuse a saída e como pensaba arranquei con moitos atrancos, xa facía tempo que non saía os primeiros metros andando e con tantos atrancos durante os primeiros metros sen ter por onde adiantar.

Así comecei a correr algo máis cómodo pasados os 250 metros iniciais e a recuperar moitos postos. Ao ir enfadado comigo mesmo polo erro que cometín, comecei a tirar moi forte coa idea de recuperar todo o terreo perdido. Pouco a pouco o ía conseguindo, as sensacións eran moi boas e xa me ía atopando cos corredores que máis ou menos están ao meu nivel polo que xa estaba en carreira. Todo isto levoume a primeira das voltas e forzando máis da conta, sobre todo nas subidas xa que era onde máis posicións recuperaba.

Así a primeira volta fágoa en 14:44 min. que supoñía un ritmo de 3:41 min/km e pasando no posto 25. O ritmo estaba moi ben pero o problema agora sería aguantar xa que o esforzo de recuperar seguramente me ía pasar factura.

Comecei a segunda volta e de momento seguía aguantando, xa non me sentía tan fresco pero parecía que podía aguantar a ese ritmo axudado do terreo favorable. Todo cambia sobre o km 5,5 xa que as forzas comezan a fallar e xa non era quen de seguir recuperando. O esforzo da primeira volta estaba comezando a pagalo. Intento seguir tirando para conservar posición xa que ía con outro corredor. Vou con el ata o km 7 onde as forzas me abandonan e decido relaxarme un pouco xa que o obxectivo do tempo non o ía dar conseguido. Comecei a mirar cara atrás para ver a diferencia e en principio tiña unha boa vantaxe pero xa na longa recta de meta que picaba levemente cara arriba, xireime e vin que viña un grupo tirando moi forte polo que sen pensalo moito, aumentei o ritmo gastando as poucas forzas que tiña e entrar en meta conservando a posición. Así remato esta segunda volta nun tempo de 15:12 min. que supoñía un ritmo de 3:48 min/km.

Os obxectivos non foron cumpridos por un erro meu xa que a pesar de saír no medio do pelotón só me quedei a 55 segundos do tempo do ano pasado. Se saíra onde tiña que saír posiblemente puidese mellorar o tempo ou quedarme moi preto. En canto o ambiente moi ben aínda que creo que houbo anos mellores e a organización tamén moi ben aínda que no avituallamento final tiñamos que sacar as augas da caixa e coller os plátanos noutra caixa do chan, creo que non custaba nada poñelos sobre unha mesa. Polo resto dende o meu punto de vista todo perfecto.

🏆 Clasificación xeral mulleres 🏆