Despois de un mes sen competir por lesión, reaparezo en Ribadavia onde se celebraba o Campionato Galego de Cross Largo sobre unha distancia de 10 km, nun circuíto de 2 km cada volta polo que teríamos que dar 5 voltas. O obxectivo será comezar a coller ritmo de competición a pesar de que sigo tendo algunha molestia, non recaer da lesión e desfrutar da carreira da que espero que haxa moito barro para que sexa máis entretido xa que vai ser o meu segundo cross en campionato e no primeiro paseino moi ben meténdome por todo o barro que había. 

Unha vez cheguei a Ribadavia fun dar unha volta polos arredores do circuíto e de Ribadavia, ata que me chamou un compañeiro de equipo para darme o dorsal e o novo suadoiro. Xa co dorsal fun a cambiarme e a pasar pola cámara de chamadas, despois de pasar todo o equipo sacamos a correspondente foto de formación coa que dar guerra.

Tras darse comezo a proba, saín dos últimos xa que ía correr 10 km despois de mes e medio sen facelo e aínda tocado, polo que fun tranquilo e con moita cabeza para ver como me respondía o xeonllo. 

Así a primeira volta dina no grupo que se estaba formando crucei con un tempo de 8:00 min e como tiña a experiencia do anterior campionato de cross que só era de 4km sabía que se me ía facer duro e intentei manter ese ritmo.

A segunda volta dina en 8:01 e bastante ben de sensacións aínda que sempre que lanzaba a perna sentía dor no xeonllo pero cada vez ía a menos polo que só tiña que ir tranquilo e ver como evolucionaba.

Na terceira volta marquei un tempo de 8:06 na que só intentaba manter ritmo e gardar forzas para o final. 

Dando a cuarta volta escoitaba por detrás miña como a xente estaba animando máis e era porque o primeiro clasificado xa estaba a piques de dobrarme, cando me din de conta intentei apertar un pouco máis para que non me pasase pero non houbo maneira xa que o ritmo que levaba era moi alto para as condicións nas que me atopaba e nunha das curvas abrinme e deixeille pasar comodamente. Encarando a recta de meta tamén me adiantou o segundo clasificado. Nesta cuarta volta marquei un tempo de 8:08. 

A última volta acusei o cansancio, falta de adestramento e a subida de ritmo que fixera na volta anterior e a metade da volta dina con flato no que apenas me deixaba respirar pero como xa só restaba 1 km aguantei como puiden para chegar a meta incluso apertando un pouco na recta de meta para que non me adiantasen e dando esta volta en 8:26 minutos. 

O final posto 126º de 188, con un tempo de 41:22 minutos que equivale a un ritmo de 4:08 min/km. O obxectivo pódese considerar cumprido xa que desfrutei moita da carreira, en principio non recaín da lesión e espero que fose un bo adestramento para ir collendo ritmo para as próximas citas. O que non me gustou foi que me dobraran xa que é a primeira vez que o fan pero o nivel que teño agora mesmo non dá máis... Espero que pouco a pouco vaia mellorando para volver aos ritmos de antes.

Podio xeral:

PD: Fotos cortesía de RunPhotos Galicia e Miler. Grazas!!