Tocou desprazarse ata Pontevedra para disputar a súa XX Media Maratón que este ano transcorría por un circuíto homologado de dúas voltas polo que o obxectivo principal, será baixar a miña MMP nesta distancia e aínda que chego algo tocado da garganta, espero que non me moleste moito e irei a polo obxectivo ata que non dea máis e despois a desfrutar o que se poida. 

Unha vez chegados a Pontevedra fun recoller o dorsal e ubicar a zona de saída e meta xa que é a primeira vez que vou participar nesta media maratón. Xa co dorsal e sabendo por onde transcorría a carreira, funme preparar e poñerme a quecer un pouco mentres saudaba aos números compañeiros de equipo que tamén ían disputar a carreira. Coloqueime na saída bastante adiante para intentar saír ben e poder empezar a marcar ritmo para buscar a marca, unha vez se deu a saída foi coma sempre mala, sobretodo pola cantidade de xente que había, polo que perdín bastantes posicións e ata 200 ou 300 metros despois non puiden empezar a marcar un ritmo e a recuperar posicións. Así chegados ao km 2,08 estaba colocado no posto 137 con un tempo de 8:13 minutos xa rodando nos 3:58 min/km. 

Seguín mantendo ese ritmo xa que había que aguantar e subir o ritmo pouco a pouco para non rebentar antes de tempo e como ía tocado da garganta estaba comprobando como respondía. No seguinte punto de control situado no km 4,68 xa ía situado o posto 124 recortando 13 posicións e con un tempo de 18:24 minutos baixando xa aos 3:56 min/km. A partir de aquí comecei a subir o ritmo xa que non notei nada de molestias na garganta quitando que de vez en cando me viña algo de tos pero que me permitía correr perfectamente. 

No seguinte punto de control situado no km 8,81, ía situado no posto 109 recortando 15 posicións, con un tempo de 34:07 e un ritmo de 3:53 min/km. O seguinte punto estaba cerca xa que nos marcaba o km 10, pese a estar cerca recortei 3 posicións e marquei un tempo de 38:34 e un ritmo de 3:52. A partir de aí engancheime a outro corredor para dar a segunda volta xa que posiblemente ía baixar o meu rendemento. O ritmo que levabamos era rápido pero “cómodo” a vez. Segundo os seguinte puntos de control o ritmo que marcamos foi como un reloxo rodando en 3:52 - 3:51 min/km e sempre gañando posicións. Así no último control antes de chegar a meta no km 20,21 estaba situado na posición 78 gañando na segunda volta 28 posicións e marcando un tempo de 1:17:35. Cando pasei por ese punto xa estaba convencido de que ía conseguir o obxectivo de baixar a miña marca pero ao ver o tempo vinme con ganas de baixar da 1:20:00 polo que empecei a dar zapatilla para intentar facer o ultimo km máis rápido pero cando cheguei a recta de meta e vin o crono que xa pasara do tempo tiven que conformarme con mellorar a marca. 

O final posto 77º de 1476 e 20º da categoría con un tempo de 1:20:54 o que equivale un ritmo de 3:51 min/km. Os obxectivos finalmente cumpridos xa que baixei 2:45 minutos polo que xa teño nova marca a superar e ademais sorprendeume o rendemento que conseguín indo de menos a máis, grazas tamén a que me enganchei a outro corredor e fun con el gran parte da carreira. Non esperaba baixar tanto tempo e quedei moi contento coa marca pero a vez frustrado xa que me vin con opcións de baixar da 1:20:00 pero bueno, para a próxima xa se intentará. 

Resumindo, carreira propia para facer marca xa que é practicamente plana, moi boa organización e gran despliegue de voluntarios. Unha magoa que o tempo non acompañara e que estivera orballando durante a carreira. Para o ano si se pode volverei para seguir baixando a miña marca.