Hoxe tocou desprazarse ata Ponte Ulla onde se disputaba a XXIV Carreira Popular de Gundián. Tocaba correr na “casa” esta carreira especial xa que foi a primeira proba que disputei ala polo 2013 e facendo así dous anos neste mundo do atletismo. 

Carreira que se faría dende a ponte vella en Ponte Ulla e que teríamos que subir ata capela de Gundián, cruzar pola ponte do tren e volver a subir para completar un recorrido duns 4km aprox. O obxectivo sería o de mellorar o meu resultado do ano pasado e non caer xa que o ano pasado nunha das curvas fun de arrastro ao confiarme moito pero que só me rasquei un pouco nunha perna. 

Despois de recoller o dorsal púxenme a quecer e a saudar a compañeiros. Unha vez que terminou a carreira anterior da categoría inferior deu comezo a nosa. 

Unha vez se deu a saída intentei colocarme nunha boa posición para afrontar a primeira curva xa que nos metemos nunha pista máis estreita pola que, ao estar aínda todos xuntos e máis complicado gañar posicións pero coma sempre mala saída e quedeime un pouco atrasado sen moito sitio por onde avanzar.

Encarando as primeiras pendentes fun gañando algunha posición pero mantendo un ritmo “tranquilo” xa que despois haberá que volver subir. Unha vez chegamos a capela de Gundián empecei a apretar un pouco e seguín gañando posicións. Cando comezou a baixada baixei un pouco o ritmo por precaución xa que a estrada estaba mollada e había perigo de esvarar. Unha vez pasada a baixada só quedaba volver subir polo que empecei a tirar forte posiblemente forte demais xa que as primeira das pendentes subina ben pero na segunda xa me chegou e quedei sen forzas para esprintar nos metros finais. 

O final posto 19º de 176 e 14º da categoría con un tempo de 15:40 o que equivale un ritmo de 3:29 min/km que me parece moi rápido para as pendentes que había polo que supoño que se equivocaron no distancia do percorrido. Os obxectivos cumpridos, sen caídas e conseguindo o mellor resultado dos tres anos que levo participando, polo que moi contento co resultado obtido e o mellor de todo é que durante a carreira non tiven molestias no tibial. 

Resumindo, carreira corta pero moi dura na que se apretas moito ao principio despois acabalo pagando pero unha das que mellor organización teñen, ademais a carreira é GRATIS e danche camiseta, medalla, avituallamento intermedio (auga) e final (auga, maza e donuts), moi bo trato ao corredor e este ano ata estivo controlada con chip. Carreiras así que quedan poucas e espero que esta siga no calendario moitos anos máis e poder correla sempre ademáis como atractivo arriba na capela onde está a meta hai pulpeiros por se non che chega o avituallamento!