Desta vez tocou desprazarse ata Silleda, onde se disputaba a I Carreira Popular Semana Verde de Galicia, con un circuíto de 10 km aproximadamente.

O obxectivo na carreira sería intentar conseguir premio en metálico, xa que ata o 8º daban premio e comprobar que tal me atopaba despois de dous fins de semana sen competir. Xa tiña gañas de volver as carreiras e máis a de Silleda que era como se correra na casa.

Cheguei pronto a Silleda para poder ir antes a Feira e ver que había de novo pero segue sendo o mesmo que todos os anos... Cando se achegaba a hora da carreira fun ver a carreira dos pequenos e xa vin a varios atletas que son máis rápidos ca min, polo que o obxectivo de levar premio metálico ía estar imposible, así que asumido iso, a desfrutar todo o que se poida da carreira e ver que sensacións me deixa. Unha vez que me cambiei, púxenme a quecer. Tras colocarnos na saída, comezou a carreira, coloqueime pola zona intermedia xa que os que ían por diante a priori son máis rápidos.

Cando só levabamos 300m xa estiven a piques de caer tras pisar sen queres a outro corredor nun xiro, por sorte non pasou nada a ningún dos dous. Ata o km 2 fun gañando posicións a partir de aí foron varios quilómetros mantendo o ritmo xa que non conseguía acercarme aos que levaba por diante. Sobre o km 5 tras pasar o avituallamento apiques estiven de lesionarme xa que pisei mal por culpa dunha pedra e case torzo o nocello, dende ese momento creo que baixei un pouco o ritmo polo “susto” e pasáronme tres atletas, intentei subir o ritmo o deles pero xa non fun capaz e as pernas non respondían ben polo que empecei a controlar que non me adiantara máis xente. Así os últimos 3 km fixéronseme duros e largos controlando a un grupo que me viña perseguindo que por sorte para min non conseguiron chegar xa que fun apertando todo o que me quedaba de forzas para poder chegar máis relaxado a meta e non ter que esprintar.

O final posto 19º de 97 e 5º da categoría, con un tempo de 36:05 e un ritmo de 3:36min/km que me estraña moito, polo que dubido que tivera os 10km como dicían pero aínda así bo tempo para non ter boas sensación durante gran parte da carreira.

Resumindo é unha carreira algo dura con subidas e baixadas constantes e camiños de terra e pedras soltas que apiques estiveron de xogarme unha mala pasada, en canto a organización agradecer o detalle da camiseta, gorra e medalla para todos os atletas pero hai moito que mellorar sobre todo en marcar ben o camiño por onde temos que ir unha vez regresados a feira xa que había que esquivar a xente que estaba a visitar a feira e marcar mellor algún cruce que podía levar a confundir.

PD: Gracias a koala36 polas fotos!