Desta vez tocou desprazarse ata Lugo onde se disputaba a I Carreira Solidaria “La vida es una carrera, ¡ven a ganarla!” onde a recadación irá destinada a Asociación de Hemiparesia Infantil, con un circuíto de 5 km aproximadamente sobre a muralla de Lugo.

O obxectivo na carreira sería intentar recuperar as boas sensación, xa que na carreira de onte non quedei moi contento co meu rendemento, a parte diso pasalo ben xa que vou con dous amigos que se ían estrear nisto das carreiras. Unha vez chegamos a Lugo xa fomos quecendo cara a saída e a recoller o dorsal que por certo volvín levar personalizado, desta vez tocou poñerlle “PACHECO” xa que ven da parte de familia de meu pai, na próxima ocasión tocará a familia por parte de miña nai. Xa con todo listo, coloqueime na saída, púxenme case adiante de todo porque non vin moita xente que puidera ir máis rápido, tampouco coñecía nin me soaba ningún dos participantes na carreira. 

Unha vez se deu a saída arranquei con algo de precaución xa que saiamos baixando cara a muralla e podía ser perigoso polo que esperei a estar xa encima da muralla para comezar a coller ritmo. Unha vez arriba xa comecei a pasarlle a corredores e a colocarme na 4ª/5ª posición, como vin que podía seguir avanzando e intentar quedar 3º fun apertando e ao paso pola primeira das voltas a muralla xa ía colocado 3º e acercándome aos dous de cabeza que ían xuntos. Seguín con este ritmo e alcancei aos de cabeza e paseilles para colocarme 1º, esta é a primeira vez que estou a liderar unha carreira e gustoume a sensación aínda que hai que saber a que ritmo tirar e ir controlando moito. 
Cando quedaban 200m para baixar da muralla e subir cara a meta, o que ía segundo pásame, eu intento seguilo pero dinme de conta que non daba polo que xa me conformaba coa 2º posición, na recta final apertei e conseguín gardar as distancias co 3º clasificado.

O final posto 2º de 120 e 2º da categoría, con un tempo de 17:11 o que equivale a un ritmo de 3:35 min/km, posiblemente non chegara a ter os 5 km pero aínda así parece que recupero as sensacións de carreira. En canto aos amigos que viñeron estrearse nas carreiras moi ben quedando na metade da clasificación e con bo tempo, agora só falta que se enganchen e volvan repetir.

Resumindo é unha corta pero bonita carreira sobre a muralla de Lugo na que se pode desfrutar moito e unha organización que para ser a primeira vez, para min estivo perfecta, o único pero foron as duchas que estaban lonxe e estivemos perdidos por Lugo buscándoas pero polo resto non hai queixa. Esperando unha próxima edición que sempre é un pracer poder correr sobre a muralla.

PD: Agradecer a boblawrenze e a anxelxade as fotos.