Hoxe despraceime ata Sigüeiro (Oroso), onde se disputaba a III Carreira Popular Concello de Oroso sobre unha distancia de 10km.

O obxectivo sería mellorar o resultado acadado o ano pasado, aínda que o circuíto era distinto e aumentou en distancia pero máis ou menos era semellante. O ano pasado acabei moi ben conseguindo a posición 21º e 9º da categoría polo que se conseguía o obxectivo de mellorar, ía haber opcións de subir ao podio.

O día era desapracible xa que chovía e algún refacho de vento que facía perder algúns segundos e ter que esforzarse máis.

Realizado o quecemento, colocámonos na saída para comezar. Púxenme adiante para intentar conseguir o obxectivo e tras darse a saída foron uns 200 metros onde perdín algunha posición e no que algún roce e golpe recibín pero é o que ten saír adiante que todos queren avanzar rápido... Tras pasar estes metros, comezaba unha pequena subida que nos levaba de volta cara o pobo, a partir de aí xa puiden ir avanzando e impoñendo o meu ritmo ata a altura do km 3,5 no que xa non conseguía avanzar a máis atletas e mantiven o ritmo xunto outro atleta. Levaba un ritmo alto pero “cómodo” ata o km 6 que empezaron unha serie de subidas que fixéronme gastar moita enerxía e no km 8 xa ía nas últimas e desexando chegar a meta. 

O ritmo elevado e as últimas costas deixaranme tocado e a partir de aí tiven que baixar levemente o ritmo porque empezoume a molestar o estómago e por medo a que me dera flato tiven que baixar unha marcha, controlando sempre ao atleta que me viña por detrás e intentando que os atletas que levaba diante non se me escaparan moito por se no último km podía recortar e gañar algunha posición. O caso foi que o desgaste foi considerable e non puiden acercarme aos atletas de adiante pero mantiven a posición co meu perseguidor.

O final grata sorpresa cando vin os resultados e me din conta que conseguín o obxectivo de mellorar a posición do ano pasado e acabei no posto 13º e 4º da miña categoría pero como os premios non son acumulativos e os dous primeiros da xeral eran da miña categoría quedei no 2º posto polo que tocaba subir por segunda vez consecutiva ao podio, con un tempo de 37:03 e un ritmo de 3:42 min/km.

O curioso foi que tras esperar para recoller o premio, estiven só no podio, xa que os atletas que tiñan que subir comigo xa marcharan e acadei todo o protagonismo e resultou que o atleta que tiña que subir ao 1º posto era co que fun durante toda a carreira ata o km 8.

En resumen, carreira algo dura que aínda se fixo máis duras polas condicións meteorolóxicas pero moi ben organizada. Para o ano intentarei volver a gozar desta carreira e mellorar o meu resultado.