Despois de ver o anuncio nunha rede social (non me lembro en cal), busquei información sobre esta proba virtual e non tiña mala pinta, a inscrición era gratis e por completala dábanche puntos na tarxeta de socio de Decathlon, polo que decidín inscribirme. 

O problema era que levaba un mes aprox. sen adestrar xa que ao non haber probas "oficiais" pois non hai esa motivación de seguir adestrando para buscar un obxectivo e para facer estas probas virtuais en principio a condición física que teño debería serme suficiente.

Na información da proba poñía que era de 5K ou 10K eu non vin en ningún lado onde escoller a distancia, cando rematei a inscrición e me enviaron o dorsal por correo electrónico poñía que era para a distancia de 5K. Mellor así xa que como dixen non estaba moi preparado. Tamén había que escoller a franxa horaria na que ías participar, no meu caso escollín entre as 10h e as 12h, pensando que había que empezar as 10h e tiñas 2 horas para rematar pero resulta que durante esa franxa podías empezar cando quixeses...

10:00h da maña e alí estaba eu no meu circuíto de carreiras virtuais, aínda co almorzo dando voltas no estómago pero pensei que para facer 5K non debía ter problemas, gran error...

Arranco a app coa que había que facer a proba e comezo a correr, tamén uso o reloxo para comprobar a distancia ao final pero non sei que lle pasou que non funcionou moi ben: primeiro non me contaba a distancia e despois non ía o tempo. Así fun facendo a primeira das voltas das case 5 que tiña que dar ata que o reloxo volve a funcionar correctamente pero xa levaba unha desfeita en tempo e distancia.

A segunda e terceira volta foron ben, mantendo un ritmo aprox. de 4:00 min/km, non é o meu ritmo habitual pero non creo que estea para moito máis. 

A partir da terceira volta viñeron os problemas gordos e que nunca me pasara porque xa tiña coidado e mantiña unha rutina pre-competición. Ao almorzar tan preto da hora de saída, tiña o leite dando voltas no estómago e rematando a terceira volta comecei a salivar en exceso e a sentirme algo mareado. Baixo o ritmo a ver se me vai pasando pero durante toda a cuarta volta vou con arcadas e apiques estiven de botar o almorzo fora. Que mal o pasei durante esa volta e media.

A última volta xa fun recuperándome un pouco pero decidín non aumentar o ritmo e rematar a proba a trote sin esforzarme máis, así foi como finalmente me saíu un ritmo máis de adestramento que de competición.

O resultado final foi:

• Posto xeral: 22º de 458. 
• Posto categoría: 22º.
• Tempo: 21:04 min.
• Ritmo: 4:12 min/km