Chegamos a Porto do Son co tempo xusto para coller o último autobús que nos levaría ata Portosín onde estaba a saída. Antes, cando xa estabamos de camiño, tiven que volver a casa porque se me esquecera coller o dorsal que xa recollera días antes.

Xa en Portosín, fun cara o gardarroupas para deixar o xersei que levaba porque estaba soprando un aire frío. Nada que ver co tempo que nos atopamos polo camiño xa que estaba a chover e facendo bastante aire pero ao chegar a costa todo cambiou e ata estaba despexado pero persistía o forte vento.

Tras entregar a roupa, xa me puxen a quecer. O vento tiña toda a pinta que ía facer de esta proba que fose máis dura xa que os refachos eran moi fortes. Incluso a mar estaba moi picada, tanto que a auga pasaba por encima do rompe-olas que protexe o porto.

Cando faltaban uns 5 min. para que dera comezo a proba, funme achegando ao meu caixón. Sabía que non estaba para ir a uns ritmos fortes polo que me coloquei máis atrás do normal e segundo fora indo a carreira xa iría apertando máis ou menos.

Xa só restaba un minuto e déronlle saída aos que facían a proba en patíns e agora era a nosa quenda, disparo ao aire e arrancou a proba.

Foto: Sin-Son 10K

Saín con moita precaución, ao estar máis atrasado hai máis xente coa que ter tino de non tropezar e tamén ía vendo como respondía o xeonllo que parecía que todo ía ben. Así o primeiro Km, saíume nun ritmo de 4:04 min/km. Pouco a pouco comezaba a notarme mellor e como todo se ía estirando, xa era máis fácil comezar a gañar postos mentres seguíamos dando esa pequena volta por Portosín antes de saír a estrada xeral e poñer rumbo a Porto do Son. Este ano nesa volta en Portosín houbo un pequeno cambio para aumentar uns metros a distancia e chegar así aos 10 Km xa que sempre daba entorno a uns 100m menos.

Foto: Marcos Creo

Saímos a estrada xeral, Km 3,5 onde seguía soprando un forte aire nas que a veces me daba a sensación de non avanzar ou que ía tirar comigo. Os ritmos xa eran mellores pero nada que ver cos de antes xa que estaba rodando entorno a 3:50 min/km e coa sensación de que estaba indo ao máximo. Aínda así, pouco a pouco seguía gañando postos.

Foto: Marcos Creo

Así cheguei ao paso polo control do Km 5, onde marquei un tempo de 20:00 min. de aguantar así chegaría a meta con un tempo de 40:00 min. lonxe do obxectivo polo que tería que apertar para intentar achegarme a el, algo complicado xa que as sensación non eran moi boas e o aire seguía soprando forte.

Foto: Sin-Son 10K

Tras pasar o punto de control continuei intentando sacar ese ritmo que me faltaba e aínda que as veces parecía que o ía conseguindo, logo me fatigaba e tiña que ir un pouco máis tranquilo. Chegamos ao punto máis duro da proba, sobre o Km 7 unha pendente de case un Km que este ano a pesar de ir mal de ritmo fun subindo bastante ben. Supoño que ao ir máis tranquilo non se me fixo tan dura como outros anos.

A partir de aí practicamente o que quedaba xa era favorable e preto do último km comecei a perder postos polo que decidín intentar dar todo o que me quedaba nese último Km, a ver que ritmo era capaz de marcar. Isto fixo que recuperase algún dese postos perdidos e facendo este último km a 3:35 min/km. Encarando a recta de meta xa me deixei levar e perdo algún posto de corredores que entraron a sprint.

Foto: Sin-Son 10K

O resultado final foi:

🏆 Clasificación xeral homes 🏆