Despois de 7 meses, volvía a enfrontarme a esa distancia coa que levo pelexando tres anos, os 21,097 Km. Para iso despraceime ata Ribeira onde se disputaba o Campionato Galego de Medio Maratón, nun percorrido que sae dende Aguiño ata Ribeira, onde se dan dúas voltas ao circuíto e que xa corrín o ano pasado.

As sensacións antes da proba non eran nada boas, supoño que serían polos nervios pero levaba o estómago cerrado e con ganas de vomitar, a parte durmín mal pero había que correr de todas formas. 

Unha vez cheguei a Ribeira, recollín o dorsal e fun para o autobús que nos levaría a Aguiño onde estaba situada a saída. As sensacións parecían que melloraban e en Aguiño xa estaba ben ou iso parecía. Mentres espero a que abrise a cámara de chamadas, vou saudando a amigos das carreiras. Paso por cámara de chamadas e póñome a quecer con Jorge Janeiro, ex compañeiro de equipo.

Chegada a hora, coloqueime na saída algo atrasado pero non quería cometer o erro do ano pasado onde posiblemente saíra moi forte e o pagara ao final. Deuse inicio a proba e arranco ben sen moitos atrancos.

Foto: Marcos Creo (La Voz de Galicia)

Pouco a pouco fun gañando postos e intentando manter o ritmo obxectivo que sería de 3:47 min/km para chegar a meta por debaixo da 1:20:00, ademais descarguei un campo de datos para o reloxo onde me ía dicindo o ritmo que tiña que facer para chegar ao tempo que lle tiña marcado.
A primeira parte da carreira pódese dicir que sería a máis dura xa que, dende o porto de Aguiño ata chegar a Ribeira tiñamos un par de costas que se apertabas moito ías acabar mal e digo porque o ano pasado pasoume. Este ano as subidas tomeinas máis tranquilo, tanto que sempre que chegaba unha me adiantaba alguén pero que despois na súa baixada correspondente o volvía a recuperar o posto.

Así fomos ata chegar a Ribeira, onde ía metido nun grupo e pasamos por meta en torno ao km 6,5 con un tempo de 24:20 min que equivale un ritmo de 3:45 min/km. De momento ía todo ben as sensacións eran boas aínda que había veces que seguir ao grupo me custaba un pouco.

Foto: Tere (Oleiros Running)

Continuamos dando a primeira das dúas volta que había que dar en Ribeira, a metade desa volta estaba o paso polo Km 10 onde marco un tempo de 37:48 min. que equivale un ritmo de 3:47 min/km xusto o ritmo que tiña que levar polo que de momento todo ía ben, aínda que o estómago me comeza a molestar outra vez e había un engadido, o vento que facía de volta pola praia do Coroso era bastante molesto.

Seguimos e viña unha das partes que menos me gusta deste percorrido, a zona urbana (Rúa de Galicia e Rúa Manzanares), a primeira parte levaba ben pero a segunda era un continuo sube baixa que non favorece nada o intento de facer marca. Intentei seguir o grupo no que estaba pero nesa última rúa comezo a perder contacto con eles.

Foto: Marcos Creo (La Voz de Galicia)

Volvemos a pasar por meta polo km 13,9 xa en solitario e marcando un tempo de 52:34 min. que supón un ritmo de 3:47 min/km seguía indo ao ritmo obxectivo polo que todo parecía indicar que era o día de conseguir a marca pero as sensación xa non eran tan boas como antes e os ritmos comezaron a caer.

Foto: Tere (Oleiros Running)

Pouco a pouco fun perdendo postos e vendo como non era capaz de aguantar o ritmo forte, ademais o estómago seguíame molestando e as pernas comezaron a fallar, supoño que a falta de preparación cara un esforzo como o que estaba intentado facer.

Todo empeorou sobre o km 17 onde comecei a marcar ritmos medios de 4:00 min/km e non era capaz de baixalos, xa non tiña máis, estaba agotado fisicamente. Esperaba que de repente todo cambiase pero nada, os ritmos cada vez eran peores e os compañeiros que me adiantaban animábanme a seguir xa que non quedaba nada para meta.

Cando faltaban dous km mirei o campo de datos novo no reloxo e vin que para cumprir o obxectivo tiña que facer os últimos dous km's en 3:00 min/km e como me era imposible, decido afrouxar e deixarme levar ata meta xa que non tiña opción de conseguir baixar de 1:20:00, mentres seguía perdendo postos pero o resultado neste caso dábame igual.

Foto: Tere (Oleiros Running)

O resultado final foi:

🏆 Clasificación xeral do campionato homes 🏆

1. Manuel Hurtado Sanjurjo .......... 1:07:06
2. Alejandro Fernández Rivera ..... 1:07:36
3. Jorge Crespo Arias ....................... 1:09:28

🏆 Clasificación xeral do campionato mulleres 🏆

1. Paula Mayobre González .......... 1:15:41
2. Sofía Freaza Otero ....................... 1:23:35
3. María Soledad Castro Soliño .... 1:26:15

🏆 Clasificación xeral da popular homes 🏆

PD: Clasificación completa. Fotos cortesía de: Marcos Creo (La Voz de Galicia), Tere (Oleiros Running). Moitas gracias.