Desta vez tocou desprazarse ata Vilagarcía de Arousa onde se disputaba a IV Media Maratón Solidaria Zona Aberta, a favor da Fundación Arousa Solidaria e que transcorría por un circuíto de dúas voltas, pasando polos pobos de Vilaxoán e Carril ata completar a distancia de 21,097 km. 

O obxectivo principal será o de mellorar a miña mellor marca persoal que está en 1:20:54, lograda na media de Pontevedra este ano. Intentarei baixar da 1:20:00 xa que o circuíto e idóneo para logralo xa que non ten pendente ningunha nin xiros bruscos que che poidan facer perder tempo. 

Unha vez chegados a Vilagarcía e tras recoller o dorsal atopei cos compañeiros de equipo para a rigorosa foto de equipo. 

Tras a foto xa nos puxemos a quentar e a preparar o corpo para a carreira, xa que a mañá estaba fría e había que espantar o frío correndo. 

Unha vez se deu a saída, comecei tranquilo sabendo o moito que quedaba de carreira e a partir do km 1 empecei con un ritmo bo e púxenme a gañar posicións, así ao paso polo km 2,8, onde estaba situado o punto de control de Vilaxoán, marquei un tempo de 10:52 min que equivale a un ritmo de 3:53 min/km e pasei no posto 61º. 

De volta cara Vilagarcía ao pasar polo centro do pobo cos ánimos da xente aumentei o ritmo sen querer e aínda que ao pasar de Vilagarcía xa dirección Carril me notaba que posiblemente fora demasiado rápido, intentei aguantar xa que de momento ía ben, tanto de pernas como en sensacións. 

Así ao paso polo segundo punto de control en Carril no km 8,1 marquei un tempo de 30:52 min o que equivale a un ritmo de 3:49 min/km e pasando na posición 48º polo que gañei 13 posicións. A partir de aquí só quedaba regresar a Vilagarcía para completar a primeira volta pero foi nese traxecto cando me din de conta que o ritmo que levaba estaba sendo moi alto para rematar a segunda volta igual ou máis forte, ademais comecei a notar cansancio nas pernas, aínda así seguín tirando xa que ía tocar sufrir de todas formas. Ao pasar Vilagarcía xa camiño de Vilaxoán alcanzo a dous compañeiros de equipo, un deles quédase e o outro sígueme polo que decido intentar manter o ritmo del para non quedarme atrás nos últimos km. 

Ao paso pola segunda vez do control de Vilaxoán pero desta vez no km 13, marquei un tempo de 49:52 min o que equivale a un ritmo de 3:51 min/km e pasei no posto 46º polo que gañei 2 posicións. Así no regreso cara Vilagarcía sigo o meu compañeiro, aínda que a min cada vez me custa máis seguilo sigo tirando con el. O paso polo centro de Vilagarcía vólveme pasar o mesmo e cos ánimos da xente tiro un pouco máis que nada máis saír de Vilagarcía xa dirección Carril pago e me vou quedando, perdendo uns metros co compañeiro e incluso xente de atrás me adianta ao non ser capaz de sacar un extra de enerxía para esa recta final. Así ao paso polo último control antes de meta en Carril no km 18,4 marco un tempo de 1:10:35 que equivale a un ritmo de 3:51 min/km e no posto 46º igual que no anterior punto de control. 

Só faltan 3 km para a meta polo que sacando forzas de onde non as hai, intento manter o ritmo de un grupo que me estaba adiantando, desta maneira consigo volver a engancharme ao compañeiro de equipo pero tras 2 km aguantando a duras penas o ritmo deste grupo, empezo a descolgarme e a non dalos seguidos polo que o último km intento dar o resto que me quedaba para chegar a meta e comprobar se conseguira baixar o tempo ou non. 

O final posto 51º de 551 e 12º da categoría con un tempo de 1:21:26 o que equivale un ritmo de 3:52 min/km. Os obxectivos finalmente non foron cumpridos xa que non conseguín mellorar a miña marca, quizais por comezar con un ritmo máis elevado antes de tempo que fixo que me cansase antes pero bueno, xa haberá máis intentos e o máis importante aprender dos erros que cometín. 

Resumindo, carreira propicia para facer marca, con un bo trato ao corredor, gran avituallamento final, animación durante a carreira e moi ben organizada. O negativo para min foi o paso por unha nave industrial que desprendía un olor non moi agradable pero niso a organización non pode facer nada e as duchas que onde eu me duchei só había catro e estaban nun segundo piso polo que subir e baixar as escaleiras despois de sufrir en carreira non me gustou moito pero serían os únicos peros da carreira, se todo sigue ben para o ano volverei estar aí intentando baixar a miña marca.