Despois da Media Maratón Coruña21, hoxe despraceime ata Xinzo de Limia onde se celebraba a Carreira Popular Concello de Xinzo de Limia. Tras pasar unha mala semana con gripe e moitísima tos que me deixou algunha noite sen case poder durmir, decidín a última hora participar xa que non aguantaba estar na casa sen poder correr (xa hai moito vicio...). Se me quedara na casa como me dixeron amig@s e familia fora mellor porque fixen unha carreira para esquecer.

Os prognósticos meteorolóxicos dicían que ía chover pero finalmente o tempo acompañou, non caeu nin gota e tivemos unha temperatura moi agradable. Unha vez realizados os exercicios de quecemento e postos na saída (xa me coloquei no fondo porque non me sentía con moita forza pola gripe) empezou a carreira que serían 10 km dando tres voltas a un circuíto urbano e completamente chan.
Na primeira volta sentíame cómodo aínda que tiña unhas pequenas molestias nos xemelgos, nos sóleos e parecía que afogaba un pouco (supoño que polo xarabe para a tos que estou a tomar) pero aguantaba ben e pasei por meta no posto 41 con un ritmo de 3:49, intentei aguantar ese ritmo sen forzar moito porque a dor dos xemelgos e sóleos ía en aumento e cada vez o ritmo era menor, xa que polo paso da segunda volta, me atopaba no posto 49 con un ritmo de 3:58.
Para desgracia miña ao pasar polo contador da segunda volta empecei a ter flato, este case non me deixaba respirar e vinme obrigado a baixar o ritmo tanto que practicamente ía andando e isto durante 2 km (agradecer aos corredores que se preocuparon por min que ata me ofreceron xel enerxético). Despois de sufrir durante eses 2 km e ir pensando seguido en parar e retirarme, a dor parecía que desaparecera e puiden continuar, claramente xa non estaba motivado e non forcei mais, ademais a dor dos xemelgos e do sóleo era forte e fun aguantando un ritmo baixo subindo un pouco os últimos 200 m para acabar a carreira decentemente. O final acabei no posto 92 de 287 atletas con un tempo de 42:12 (moi lonxe das miñas últimas marcas) con un ritmo final de 4:14.

En resumen é unha boa carreira, aínda que eu non son moito de carreiras por voltas e algo lonxe para min pero estou moi descontento cos "recortadores" xa que en todas as esquinas ían polas aceras incluso unha das que controlaba nunha das curvas chamoulle a atención aos corredores que eu levaba diante e na seguinte volta esta colocouse na esquina da curva para que nadie se subira a acera. Cando se empezará a desclasificar por recortar? Polo resto todo moi ben.

Agora a seguir adestrando para ir a por MMP en Padrón e a aliviar a sobrecarga que teño nos xemelgos e sóleo.