Tras a carreira-adestramento de onte en Lestedo, hoxe desprazámonos ata A Coruña onde se celebraba a VII Media Maratón Coruña21 con distancia homologada, polo que o obxectivo era mellorar a miña MMP anterior conseguida en Vilagarcía de 1:27:35 e si se podía correla por debaixo dos 4 min/km moito mellor o que sería facer a Media Maratón por debaixo de 1:24:00.

O día parecía que non nos ía acompañar xa que ameazaba chuvia pero que finalmente só caerían catro gotas antes de darse a saída, nada importante. Xa colocados nos caixóns, deuse o pistoletazo de saída, primeiro para os vehículos adaptados e logo para o resto. A saída para o meu parecer algo estreita para a cantidade de participantes que había, isto provocou que se tomara moita precaución para non caer. 

Unha vez que saiamos do paseo cara a estrada algo máis ancha, púxenme a pensar no meu obxectivo e para conseguilo tiña que quedar por diante de Pedro Nimo que nesta ocasión ía de lebre co globo de 1:25:00 e sacarlle un minuto. 

Así que sen perder de vista o globo (ía a uns 500m por diante miña), púxenme a pasarlle a corredores para intentar collelo, non foi fácil porque ao saír no terceiro caixón e el no segundo tiña a bastantes corredores por diante. 

No paso polo control do km 4,2 o meu posto ía ser o 358 con un ritmo de 4:10, este tempo non me valía e ao ver que seguía sen pillalo subín o ritmo un pouco, no seguinte punto de control no km 8,1 xa estaba colocado no posto 262 con un ritmo de 4:04 e con Nimo a escasos metros polo que antes do km 9 xa o tiña pasado e marcando o meu propio ritmo para conseguir a marca obxectivo, sentíame bastante cómodo con ese ritmo e funo aguantando, no control do km 11,8 estaba no posto 194 con un ritmo de 4:04. 

A partir de aí empecei a subir un pouco máis o ritmo para buscar o tempo obxectivo e pode ser que forzara moito na “subida” cara a rotonda do Milleniun km 13,4 onde había outro control, posto 188 a un ritmo de 4:00, xa que despois de dar a rotonda empezábame a dar unha dor no cuadríceps dereito que me fixo pensar que non o ía conseguir pero a dor foi a menos e non tivo maior consecuencia.
Subindo cara a torre de Hércules as pernas xa ían nas últimas pero con razón porque o ritmo era elevado para min pero si se quere algo hai que sufrir e o pasar polo último control na rotonda de Breogán, ía na posición 173 a un ritmo de 3:58.

A última parte da carreira era todo baixar pero as miñas pernas xa non podían máis e empezáronme a adiantar algúns corredores que deixaron as forzas para o final, para sorpresa escoito a voz de Pedro Nimo por detrás e pensei “pero se vai para 1:25:00, moito estou baixando o ritmo, non vou conseguir o obxectivo”, isto fíxome reaccionar e fixen os últimos 3 km practicamente a fondo porque seguía escoitando a Nimo miña animando a xente pero a maior sorpresa foi cando vin o reloxo de meta e vexo o meu tempo 1:23:39 polo que o obxectivo estaba cumprido, grazas a que finalmente Nimo viña un minuto por debaixo do seu tempo pero que fixo que eu conseguira o meu propósito.

Ao final baixei 4 minutos a miña MMP e quedei no posto 172º de 2269 e na categoría de 58º de 541 a un ritmo final de 3:58.

Dar tamén a noraboa a organización, voluntarios e fotógrafos da carreira porque para min foi perfecta seguramente para o ano volva repetir e se é homologada buscar outra vez unha MMP que para iso sigo entrenando e desfrutando deste deporte.