Desta vez tocou desprazarse ata Santiago de Compostela onde se disputaba a II Carreira Camiño das Letras con un circuíto que ía dende Lavacolla ata o Monte do Gozo de 8,5 km.

O obxectivo na carreira sería coma sempre desfrutar, sobre todo do tramo do Camiño Francés no que sempre te atopas con peregrinos que te animan e sendo máis ambicioso, intentar subir ao podio nunha carreira dura na que participei o ano pasado pero que por saír de festa o día anterior e chegar xusto cando xa se ía dar a saída o pasei mal durante toda a carreira, así que teño que mellorar o resultado do ano pasado no que conseguín chegar no posto 41 con un tempo de 40:56.

Día de calor que se facía agradable para correr e para que o público animase aínda que facía algo de vento que a min me molestaba.

Unha vez chegados ao Monte do Gozo xa collín o primeiro bus que me levaría a Lavacolla onde se atopaba a saída, unha vez chegados alí como aínda faltaba moito para darse a saída tiven tempo de descansar e recordar como era o recorrido para ir atacando e reservar forzas. Cando a xente empezaba a quentar eu tamén me puxen, xa que había que quentar ben pola dureza do percorrido. Tras darse o pistoletazo de saída, intentei ir no grupo de cabeza que nos primeiros metros seríamos sobre uns 20/30 corredores pero que tras a primeira das costas xa se foi estirando o grupo e os tres de cabeza xa se ían do resto. 

Eu no paso polo km 1 xa me atopaba entre os 10 primeiros con un ritmo alto pero que de momento aguantaba ben. Durante os seguintes km fun aguantando ese ritmo incluso subindo nas duras costas que había e ía ben, pasando corredores e gañando posicións ata que cheguei a colocarme na 4º posición. Ao lonxe sempre fun vendo o que estaba no 3º posto e por ambición intentaba collelo pero cada vez custábame máis seguir o ritmo que levaba e empecei a preocuparme do atleta que viña por detrás que cada vez estaba máis cerca. Fun reservando algo para o final poder apertar e que non me collese e así foi, aínda que eses 2 últimos km fóronme durísimos polo cansancio e o tramo de herba polo Monte do Gozo baixando xa fun por inercia, o final aguantei a posición.

O final posto 4º de 137 e 1º da categoría, novo podio para seguir coa racha e desta vez moi preto de subir ao podio xeral, así que moi contento con este resultado nunha carreira moi dura, con un tempo de 32:53 o que equivale a un ritmo de 3:52.O final conseguín os obxectivos da carreira e mellorei bastante o resultado do ano pasado polo que se deduce que a festa e correr ao día seguinte non son compatibles.

Resumindo é unha carreira moi dura con constantes subidas e baixadas fortes pero que está moi ben organizada, un circuíto fermoso cos peregrinos animando e con moi bo avituallamento final, seguro que para o ano repito e a ver se dou mellorado o resultado e intentar gañar o trofeo que só dan aos 3 primeiro xa que por categoría dan un lote de libros.